कैलाली । कैलालीको बर्दगोरियामा आजदेखि माघी मेला सुरु भएको छ । हरेक वर्ष माघीका अवसरमा लाग्दै आएको मेला यसवर्ष बर्दगोरिया विकास क्षेत्र तथा संरक्षण मञ्चको आयोजना सञ्चालन हुन लागेको हो । गाउँपालिकाको वडा नम्बर २ स्थित धार्मिक तथा पर्यटकीय क्षेत्र बर्दगोरिया धाममा सुरु भएको माघी मेला चारदिनसम्म चल्नेछ । मेलामा भारतीय, स्थानीय नेपाली कलाकर्मीको प्रस्तुति रहने आयोजकले जनाएको छ ।
“बर्दगोरिया धार्मिक पर्यटकीय धाम घुम्न जाऔँ स्थास्थ्य, शिक्षा, साहित्य, कला र संस्कृति जोगाऔं” भन्ने नाराका मेलाको शुक्रबार गाउँपालिका अध्यक्ष कर्णबहादुर कुवरले उद्घाटन गरेका छन् । 
बर्दगोरिया विकास क्षेत्र तथा संरक्षण मञ्चका अध्यक्ष तथा मेला संयोजक जगराम डंगौराको अध्यक्षता भएको उद्घाटन कार्यक्रममा विशिष्ट अतिथि बर्दगोरिया गाउँपालिकाका उपाध्यक्ष गणेशराज गिरी रहेका थिए ।
कार्यक्रममा जनप्रतिनिधि, स्थानीय राजनीतिक दलका प्रमुख, विभिन्न संघ सस्थाका प्रमुख तथा प्रतिनिधि,थारु भल्मन्सा, समाजसेवी तथा बुद्धिजीवीको उपस्थिति रहेको थियो । उद्घाटन कार्यक्रमका प्रमुख अतिथिसमेत रहेका गाउँपालिका अध्यक्ष कुँवरले बर्दगोरिया धामको वृद्धि विकासमा विशेष जोड दिने बताए ।
कार्यक्रममा गाउँपालिका उपाध्यक्ष गिरीले बर्दगोरिया धामको विकास र उन्नतिका लागि गुरु योजनासहित यहाँको धार्मिक, पर्यटकीय तथा साँस्कृतिक क्षेत्रको पहिचान गराउन आवश्यक रहेको बताए । पौराणिक तथा धार्मिक मान्यता रहेको माघी मेला विगत वर्षदेखि लाग्दै आएको माघी मेलामा यसपटक स्थानीय तथा राष्ट्रिय कलाकारका साथै भजन किर्तन, रामलीला लगाएतका प्रस्तुति रहने आयोजकले जनाएको छ ।
मेलाको माध्यमबाट बर्दगोरिया धार्मिक क्षेत्रको तीव्र विकासका साथै बर्दगोरिया धार्मिक क्षेत्र प्रचारप्रसार गर्ने र आन्तरिक पर्यटनलाई प्रबर्द्धन गर्न माघी मेलाको आयोजना गरिएको मेला मूल आयोजक समितिका संयोजक जगराम डंगौराले बताए ।
कार्यक्रममा बौनिया बजार व्यवस्थापन समितिका अध्यक्ष अमरबहादुर बम, वडा नम्बर २ का वडाअध्यक्ष गोविन्द विक, ईलाका प्रहरी कार्यालय सुखडका डीएसपी वीरेन्द्र विश्वकर्मा, माओवादी केन्द्र बर्दगोरियाका इन्चार्ज रुपक सुनार लगायतले शुभकामना मन्तव्य राखेका थिए । 
बर्दगोरिया विकास क्षेत्र तथा संरक्षण मञ्च सचिव नविन ढुंगानाले स्वागत मन्तव्य राखेको कार्यक्रमको सञ्चालन मिडिया संयोजक एवं पत्रकार कृष्णप्रसाद ओझाले गरेका थिए ।
