कैलाली । कैलालीको घोडाघोडी नगरपालिका–४ गणेशपुरमा रहेको सिताकुण्ड माध्यामिक विद्यालयमा केही दिनदेखि लागेको तालाबन्दी खोलेको छ ।
लामो समय देखी विद्यालयमा गणित विषयको शिक्षक नहुँदा पठनपाठनमा समस्या भएको भन्दै विप्लव निकट अखिल नेपाल राष्ट्रिय स्वतन्त्र विद्यार्थी युनियन(क्रान्तिकारी)ले प्रधानाध्यापकको कक्षमा तालाबन्दी गरेको थियो।
विद्यार्थीहरूले पटक पटक माग राख्दा समेत विद्यालय प्रशासनले कुनै पहल नगरेको क्रान्तिकारीले जनाएको छ । तुरुन्तै गणित विषयको शिक्षक छनोट गरी विद्यार्थीको पठनपाठनमा सहजीकरण गर्न सङ्गठनले जोडदार अपिल गरेको थियो ।
आज विद्यालय र अखिल नेपाल राष्ट्रिय स्वतन्त्र विद्यार्थी युनियन(क्रान्तिकारी)को रोहवरमा विद्यालयको कार्यालयमा लगाइएको ताला खुलाइएको हो ।
विभिन्न माग राखी विद्यार्थी र अखिल नेपाल राष्ट्रिय स्वतन्त्र विद्यार्थी युनियन(क्रान्तिकारी)ले यही जेठ ११ गतेदेखि गणेशपुर स्थित विद्यालयमा तालाबन्दी गरेको थियो ।
विद्यालय,विद्यार्थी र अखिल नेपाल राष्ट्रिय स्वतन्त्र विद्यार्थी युनियन(क्रान्तिकारी) बीच विभिन्न मागहरुमा सम्बोधन गर्ने गरी निर्णय भए पछि ताला खोलेको हो ।
