कैलाली। पत्रकार दिपक रावलले लोपोन्मुख राउटे समुदायसँग परम्परागत मितेरी साईनो गाँसेका छन्। लामो समयदेखि राउटे समुदायको जनजीवन, संस्कृति, रहन-सहन र भेषभूषा सम्बन्धमा समाचार तथा जनचेतनामूलक सामग्री निर्माणमा सक्रिय रहँदै आएका कैलाली लम्कीका रावलले राउटे मुखिया दिल बहादुर शाहीका छोरा गोबिन्द शाहीसँग राउटे परम्परा अनुसार मितेरी साईनो जोडेका हुन्।
सुर्खेतको बिरेन्द्रनगर-१ स्थित रानी घाटमा रहेको राउटे वस्तीमा पुगेका रावलले राउटे परम्परा अनुरूप लोकल कुखुरा, सेतो पकडी, र नेपाली ढाकाको टोपी आदान-प्रदान गरी मितेरी साईनो गासेका थिए। परम्परागत रूपमा सम्पन्न भएको यस विशेष कार्यक्रममा संचारकर्मी, स्थानीय व्यक्तित्व तथा सुरक्षा कर्मीहरुको उल्लेख्य उपस्थिति रहेको थियो।
मितेरी साईनो गासेपछि पत्रकार रावलले राउटे समुदायको वर्तमान अवस्था र समस्याहरूको चर्चा गर्दै, “सरकारले भत्तामात्र दिने तर उनीहरूको जीवनस्तर सुधार्न कुनै ठोस योजना अघि नबढाएको” टिप्पणी गरेका छन्।
रावलको मितेरी साईनो कार्यक्रममा विभिन्न सञ्चार माध्यमका संचारकर्मीहरूको समेत उपस्थिति थियो, जसमा एबिपी क्राईम न्युजका आशिष मल्ल ठकुरी, नेपाल डायरीका प्रबन्धक गोविन्द सोडारी, बिटिएम मिडियाका प्रबन्धक भिम तारामी मगर, र कर्णाली रिपोर्टर्सका समाचारदाता प्रज्वल चुनारा र सरिता शाही लगायतका व्यक्तिहरू सहभागी थिए। यो विशेष मितेरी साईनोले राउटे समुदायको परम्परालाई सम्मान गर्दै उनीहरूको संरक्षण र प्रबर्द्धनका लागि जनचेतना अभिवृद्धि गर्ने विश्वास गरिएको छ। स्रोत : एबीपी क्राइम न्युज
