कैलाली । बरदगोरिया बहूद्देशीय सहकारी संस्थाको २४ औँ वार्षिक साधारण सभा सम्पन्न भएको छ । कैलाली जिल्लाको बर्दगरिया गाउँपालिका वडा नं २ काे बौनियामा रहेको सहकारी संस्थाको चौविसौं वार्षिक साधारण सभामा संस्थाका अध्यक्ष उमा शङ्कर अवस्थीको सभापतित्वमा भएको कार्यक्रमका प्रमुख अतिथि बर्दगोरिया गाउँपालिका अध्यक्ष कर्ण बहादुर कुँवर रहेका थिए । कार्यक्रममा विशिष्ट अतिथि गाउँपालिका उपाध्यक्ष गणेश राज गिरि रहेका थिए ।
कार्यक्रममा बोल्दै प्रमुख अतिथि कुँवरले संस्थाले राम्रो काम गरेको भन्दै प्रशंसा व्यक्त गरेका थिए । उनले भने ‘यस सहकारीलाई ठुलो योजनाका रूपमा अगाडी बढाउनु पर्छ ।’
अध्यक्ष कुँवरले पालिका र आफूबाट हुने सहयोग सदै गर्ने प्रतिबद्धता समेत व्यक्त गरेका छन् । अध्यक्ष कुँवरले सहकारीको सिद्धान्त, नीति र विधिमा सञ्चालित बचत तथा ऋण सहकारी संस्था आर्थिक सङ्कटमा नपर्ने बताएका छन् ।
पालिका उपाध्यक्ष गिरिले सहकारीले शेयर सदस्य बढाउने सँगै बचत मात्र नगरी कुनै उद्योग सञ्चालन गरी उत्पादनलाई बढुवा दिन आवश्यक रहेको बताए । उनले पालिका र सहकारीको लगानिमा कुनै उद्योग स्थापना गरी उत्पादनलाई बढाई किसान र शेयर सदस्यहरूलाई आत्मनिर्भर बनाउन तर्फ जोड दिनु पर्ने बताए ।
संस्थाका कोषाध्यक्ष ध्वज बहादुर सुनारको स्वागत मन्तव्य सँगै सुरु भएको कार्यक्रममा बर्दगोरिया गाउँपालिका वडा नम्बर २ का अध्यक्ष गोविन्द बि क , बौनिया बजार व्यवस्थापन समितिका अध्यक्ष अमर बहादुर बम, समाजसेवी डबल बहादुर विश्वकर्मा र केशव भण्डारीले शुभकामना मन्तव्य राखेका थिए ।
सहकारी संस्थाले पूर्व अध्यक्ष अजब सिंह मल्ल, शेयर सदस्य बहादुर सिंह कडायत , चेत राज भट्ट ,मान बहादुर रावल सहित २ दर्जन बढी शेयर सदस्यलाई खादा, प्रमाणपत्र सहित सम्मान गरेको छ ।
कार्यक्रममा संस्थाका अध्यक्ष उमा शङ्कर अवस्थिले वार्षिक प्रगति प्रतिवेदन प्रस्तुत गर्दै बचतकर्तालाई समय समयमा कार्यालयमा आएर संस्थाको वित्तीय जानकारी लिन आग्रह गरे । अवस्थिले आर्थिक वर्ष २०८०÷०८१ को अनुमानित आय २३ लाख , ९९ हजार प्रस्तुत गरे ।
कार्यक्रमको सञ्चालन संस्थाका सह सचिव कृष्ण भण्डारीले गरेका थिए । २०५७ चैत १५ गतेदेखि आफ्नो सेवा थालनी गरेको सो सहकारीमा हाल ४ सय ६७ शेयर सदस्य आबद्ध छन् भने कूल सम्पत्ति १ करोड १९ लाख रुपैयाँभन्दा माथि पुगेको संस्थाका प्रबन्धक बाबुराम पाण्डेले जानकारी दिएका छन् ।
संस्थाले आफ्नै भवनबाट सेवा सुविधा दिँदै आएको छ ,साथै आगामी दिनमा संस्थालाई चलायमान बनाउन भुक्तानी गर्दा चेक मार्फत गर्ने योजना समेत अगाडी सारेको छ ।
