कैलाली । कैलालीको बर्दगोरिया गाउँपालिका–३ स्थित दानुफाँटा नमुना सामुदायिक वन उपभोक्ता समूहको ११ औं वार्षिक साधारण सभा सम्पन्न भएको छ । शनिबार भएको चुनावी साधारण सभाबाट टेकराज जोशीको अध्यक्षतामा १३ सदस्यीय नयाँ कार्यसमिति सर्वसम्मत चयन गरिएको छ ।
यसअघिल्लो कार्यकालमा पनि अध्यक्ष रहेका जोशी पुनः सर्वसम्मत अध्यक्ष चयन भएका हुन् । जसको उपाध्यक्षमा नन्दाराम विष्ट र धनबहादुर विश्वकर्मा, सचिवमा लक्ष्मीदेवी सापकोटा, कोषाध्यक्षमा दृवबहादुर विश्वकर्मा, सहसचिव चक्रबहादुर विष्ट, सदस्यमा सविना बडुवाल, टेकसरा हमाल, विरबहादुर रानामगर, जुनादेवी भण्डारी, कलशा शाही, भविसरा सार्की चयन भएका छन् ।
एकजना महिला सदस्य कार्यसमिति बैठकले मनोनीत गर्ने बताइएको छ । साधारण सभाले आर्थिक वर्ष २०७८/०७९ को कुल ३७ लाख २९ हजार ३०७ रुपैयाँ बराबरको आयव्यय अनुमोदन गरेको छ । सामूदायिक वनले समूह सशक्तिकरणको माध्यमबाट वन समूहको संस्थागत विकासका साथै आयआर्जनमा जोड दिइ उपभोक्ताको जीवनस्तर माथि उकास्ने कार्य लिएको बताइएको छ ।
२०६९ सालमा ९८.४४ हेक्टर क्षेफलमा फैलिएको वनक्षेत्रको विकास र विस्तार गर्दै हाल ४५६.९४ हेक्टर क्षेत्रफलमा फैलिएको छ । सामुदायिक वनले २०७० जेष्ठ ७ गतेदेखि वैज्ञानिक वनको अवधारणा लागू भएको हो । उक्त वनमा कुल ६५४ घरधुरीका उपभोक्ता आबद्ध छन् । विभिन्न प्रजातिका १३ हजार ५ रुखविरुवा रोपिएको वैज्ञानिक वन अहिले हराभरा देखिएको छ भने विभिन्न वन्यजन्तुसमेत देखा पर्न थालेका छन् ।
वन उपभोक्ता समूहले संस्थाको विनियम अनुसार कुल आम्दानीको २५ प्रतिशत वन विकासमा, ३५ प्रतिशत समूहभित्रका विपन्न समूहको आयआर्जन तथा रोजगारमूलक कार्यमा बजेट विनियोजन गरि कार्य गर्दै आएको जनाएको छ ।
सामुदायिक वनले सडक ग्राबिल, झाडी सफाई, नदी कटान रोकथाम र आगलागि नियन्त्रण गर्न अग्नी रेखा निर्माण लगायत ४० प्रतिशत रकम सार्वजनिक निर्माण तथा प्रशासनिक क्षेत्रमा खर्च गरेको जनाएको छ ।
