कैलाली । कैलालीको बर्दगोरिया गाउँपालिका वडा नं ३ मा यही फागुन १३ गतेदेखि दादुरा रुबेलाविरुद्धको खोप अभियान सुरु हुने भएको छ ।
खोप अभियानलाई सफल पार्न शुक्रबार वडा स्तरीय खोप समन्वय समिति,संचारकर्मी र सरोकारवाला निकाय संग अभिमुखिकरण कार्यक्रम सम्पन्न भएको छ । रानीकुन्डा सामुदायीक स्वास्थ्य ईकाईको आयोजनामा भएको कार्यक्रममा दारुरा रुबेला खोपलाई कसरी प्रभावकारी बनाउन सकिन्छ भन्ने बारेमा छलफल भएको छ । 
वडामा सुरु हुन लागेको खोप अभियानको आवश्यक तयारी पूरा भएको रानीकुन्डा सामुदायीक स्वास्थ्य ईकाईले जनाएको छ । कार्यक्रममा रानीकुन्डा सामुदायीक स्वास्थ्य ईकाईका प्रमूख शिव कुमार कठरियाले फागुन १३ गतेदेखि सुरु हुने खोप अभियान फागुन २३ गतेसम्म चल्ने बताए । उनकाअनुसार खोप अभियान अवधिमा वडाभित्रका ९ महिनादेखि १५ वर्ष उमेर समुहका करिब २३ सय बालबालिकालाई खोप लगाइनेछ ।
वडा अध्यक्ष मनऋषि आचार्यको सभाध्यक्षतामा भएको कार्यक्रममा रानीकुन्डा सामुदायीक स्वास्थ्य ईकाईका प्रमूख शिव कुमार कठरियाले दादुरा रुवेला रोगबिरुद्धको राष्ट्रिय खोप अभियान सफल पार्नका लागि सहयोग गर्न सबै सरोकारवालाहरु निकायहरुलाई आग्रह समेत गरेका छ्न । खोप अभियानका लागि वडा भित्र रहेका विभिन्न सामुदायिक तथा संस्थागत विद्यालय, स्थानीय खोप केन्द्र, स्थानीय संस्था गरि ७ वटा केन्द्र तोकिएको छ । दादुरा–रुबेला भएका बेला ज्वरो आउने, शरीरमा राता बिबिरा आउने, रुघाखोकी लाग्ने, आँखा पाक्ने जस्ता लक्षण देखिने भन्दै समयमा उपचार नगरेर आँखा नदेख्ने समस्याका साथै निमोनिया, कान पाक्नेलगायत समस्या हुने र बालबालिकाको मृत्यु नै हुनसक्ने भएकाले भएकाले खोप अनिवार्य मानिएको छ ।
चिकित्सकका अनुसार सामान्यतयाः दादुरा–रुबेला लागेका बिरामीमा आँखा पाकेर अन्धो हुने, कान पाकेर नसुन्ने, निमोनिया भएर श्वासप्रश्वास फेर्न समस्या देखिन्छ । सरकारले २०२६ सम्ममा नेपालबाट दादुरा–रुबेला रोग पूर्णरुपमा निवारण गर्ने उदेश्य राखेको छ ।
