कैलाली । आफ्नो जन्मदिनमा महंगो खर्च गरेर मनाउने संस्कार छ। धर्तीमा पाइला टेकेको दिनलाई भोजभतेर गरेर फजुल खर्च गदैं उत्सवको रुपमा मनाउनेहरूको बीचमा सामाजिक एवम् मानवीय सेवामा सधैं सक्रिय भूमिकामा रहन एक प्रधानाध्यापकले बालबालिका र विद्यार्थीको शिक्षादीक्षामा सहयोग गरेर विद्यालयमा जन्मदिन मनाएकी छिन्।
कैलाली जिल्लाको बर्दगोरिया गाउँपालिका –६ जगतपुरमा रहेको पारस आधारभूत विद्यालयकी प्रधानाध्यापक कृष्णा कुमारी कठरियाले आफ्नो जन्मदिनको अवसरमा विद्यालयमा अध्ययनरत बालबालिकालाई पोसाक वितरण गर्नुभएको छ । जन्मोत्सवको अवसरमा गरिने फजुल खर्च कटाएर प्रधानाध्यापक कठरियाले विद्यार्थीका लागि शैक्षिक सामाग्री सहयोग गरकी छिन ।
आफनो ४० औ जन्मोत्सवका अवसरमा विद्यार्थीलाई १० हजार मूल्य बरावरको पोशाक र शैक्षिक सामाग्री वितरण गर्नुभएको हो । आफै अध्यापन गराई रहेको विद्यालयका वालविकास देखि कक्षा ५ सम्म अध्ययनरत विद्यार्थीलाई प्रधानाध्यापक कठरियाले पोसाक, कापी र सिसा कलम वितरण गर्नुभयो । लामो समयदेखि सोही विद्यालयमा रहेर काम गर्दै आउनुभएकी प्रधानाध्यापक कठरियाले जन्मदिनको अवसर पारेर विद्यालयका सम्पूर्ण विद्यार्थीलाई विद्यालय पोसाक, कापी र सिसा कलम दिएको विद्यालय व्यवस्थापन समितिका अध्यक्षका अमित डगौराले जानकारी दिनुभयो ।
विद्यालय पोसाक किन्नसमेत गाह्रो पर्ने अभिभावक भएकाले सहयोग गरेकोमा प्रधानाध्यापक कठरियालाई जन्मदिनको शुभकामना तथा धन्यवाद दिँदै अध्यक्ष डगौराले यस्ता अवसरमा अन्य व्यक्तिले समेत सहयोग गर्नुपर्नेमा जोड दिनुभयो ।
विद्यालयमा रहेका बालबालिकालाई पठनपाठनमा सहयोग गर्ने उद्देश्यले पोसाक उपलब्ध गराएको प्रधानाध्यापक कठरियाले बताउनुभयो । उहाँले भन्नुभयो, ‘जन्मदिनको अवसरमा केही सकारात्मक काम गरौँ भन्ने मनमा लागेकाले विद्यार्थीलाई पोसाक सहयोग गरेको हुँ ।’
प्रधानाध्यापक कठरियाले आफ्नो व्यक्तिगत खर्चमा, विभिन्न संघ संस्थाहरुलाई सहयोग गर्दै आईरहनु भएको छ । उहाँले हरेक वर्ष आफ्नो जन्मदिन विभिन्न सामाजिक काम गरेर मनाउने बताउनु भएको छ।
