बौनियाँ,—नेपाली कांग्रेस कैलालीको सभापति चयनका लागि दोस्रो चरणको मतदान हुने भएको छ । सभापति पदका लागि पहिलो चरणमा कसैले पनि ५१ प्रतिशत मत ल्याउन नसकेपछि बिहीबार पुनः दोस्रो चरणको निर्वाचन हुन लागेको हो ।
दोस्रो चरणको निर्वाचनमा संस्थापन पक्षकै सभापति पदका उम्मेदवारबीच प्रतिस्पर्धा हुने भएको छ । फागुन १५ सम्पन्न जिल्ला निर्वाचनबाट तीनैजना प्रतिस्पर्धीको ५१ प्रतिशत मत नपुगेको पछि पुनः मतदान हुन लागेको निर्वाचन समितिले जनाएको छ ।
सभापति पदका लागि हुने दोस्रो चरणको मतदान धनगढीस्थित कैलाली उद्योग वाणिज्य संघको सभाहलमा हुने निर्वाचन समितिले जनाएको छ । जिल्ला निर्वाचन अधिकृत टेकप्रसाद सुवेदीका अनुसार बिहीबार बिहान ८ बजेदेखि संघको सभाहलमा मतदान गर्ने कार्यतालिका सार्वजनिक गरिएको छ ।
कांग्रेस कैलालीको सभापति चयनका लागि दोस्रो चरणको मतदानमा कांग्रेसको इतर पक्ष विभाजित देखिएको छ । बुधबार जिल्लाको धनगढी र लम्कीमा भएका छुट्टाछुट्टै पत्रकार सम्मेलनमा इतर पक्षले बम र भट्टलाई समर्थन जनाउँदै सहयोग गर्न आग्रह गरेपछि जिल्लाको राजनीतिमा एकाएक तरंग पैदा भएको छ ।
धनगढीमा भएको पत्रकारसम्मेलनमा इतर पक्षका सभापति पदका उम्मेदवार रामबहादुर कलेलले दोस्रोपटक हुने निर्वाचनमा प्रकाशबहादुर बमलाई साथ दिने बताउनुभयो ।
बुधबार बेलुकी धनगढीमा बम समूह र इतर पक्षले संयुक्त पत्रकार सम्मेलन गरेर दोस्रो चरणको निर्वाचनमा बम समूहलाई सघाउने बताएको छ । बम समूहसंग सहकार्य गरेर दोस्रो चरणको निर्वाचनमा सहयोग गर्न मतदातालाई आग्रहसमेत गरिएको छ ।
बमलाई पूर्व केन्द्रीय सदस्य एवं पूर्व राज्यमन्त्री चन्द्रसिंह भट्टराई, सुदूरपश्चिम प्रदेश महामन्त्री तथा निवर्तमान जिल्ला सभापति नरनारायण शाह,पूर्व जिल्ला सभापति
गोविन्दराज जोशी, सभापति पदका उम्मेदवार (शेखर कोइराला समूह) रामबहादुर कलेल, संविधान सभा सदस्य बुद्धिसागर चौधरी, पूर्व जिल्ला उपसभापति वीरबहादुर हमाल, जिल्ला सचिव पूर्ण कुँवर, जिल्ला सचिव दीपकराज जोशी, पूर्व जिल्ला सचिव रामचरण चौधरी लगायतको समर्थन रहेकोे बताइएको छ ।
यसअघि पहिलो चरणको निर्वाचनमा इतर पक्षका उम्मेदवार रामबहादुर कलेलले १ सय ९७ मत प्राप्त गरेका थिए । सो मत बम समूहलाई हाल्न लगाउने बताउँदै इतर पक्षबाट उम्मेदबार बनेका कलेलले भने,‘पहिलो चरणको निर्वाचनमा सबैभन्दा बढी मत प्राप्त गर्ने प्रकाश बम समूहलाई हामीले समर्थन गर्ने भएका छौँ ।’
आफूहरु भोलि हुने निर्वाचनमा बमका लागि सँगसँगै गएर भोट माग्ने उनले बताए । ‘हामी भोलि उहाँका लागि सँगै मत माग्ने छौँ,’ कलेलले भने,‘हामी केन्द्रले विधानविपरीत गरिरहेको निर्णय, केन्द्रको हस्तक्षेपका विरुद्धमा बमलाई समर्थन गर्दैछौँ ।’
उहाँले अहिले केन्द्रबाट मतदातालाई डर, त्रास, प्रलोभन पार्ने लगायतका काम भइरहेको बताउँदै भन्नुभयो ,‘यहाँ केन्द्रबाट धेरैलाई वडा अध्यक्षदेखि मेयर तथा प्रदेश संसदसम्मको अफर आइरहेको छ, त्यसका लागि कांग्रेस संस्थापन पक्षले प्रलोभन देखाएर मतदाता तान्ने प्रपञ्च गरिरहेको छ, त्यसमा हामी कत्तिपनि विचलित हुँदैनौं ।’
यस्तै, लम्कीमा इतर पक्षका नेता, महासमिति सदस्य कमलबहादुर शाहले दोस्रोपटक हुने सभापति पदको निर्वाचनमा नरायणदत्त भट्टलाई समर्थन जनाउँदै सहयोग गर्न आग्रह गर्नुभयो ।
उहाँले भन्नुभयो ‘कमल शाह शेरबहादुर देउवाको टीममा मिल्यो र शेरबहादुर देउवाले धेरै ठूलो आश्वासन दिइसक्यो कि भन्ने भ्रममा नपर्नु होला । मैले एक दुईवटा कुरा सोचेँ हिजो लामो समय कैलाली जिल्लामा हिजोको संस्थापनमा काम गरेका साथीहरूको आज मैले धेरै कुरा सुने, यसबाट मलाई के लाग्यो भने एउटा अवसर प्राप्त भएको छ । अबको स्थानीय निर्वाचनमा हामी संस्थापन पक्ष र संस्थापन इतर पक्षलाई स्थानीय तहको निर्वाचन कसरी एक गराएर लैजान सकिन्छ, त्यो एकताको सन्देश दिन मैले खोजेको हो ।’ मैले दुबै पक्षलाई सन्देश दिने उपयुक्त समय यो भन्दा अरुबेला हुँदैन भन्ने लाग्यो उहाँले बताउनुभयो ।
भट्टलाई पार्टीका केन्द्रीय सदस्यहरु नृपबहादुर वड, रामजनम चौधरी, ईश्वरी न्यौपाने, शुसिला मिश्र भट्ट, जीवन राना, केन्द्रीय सदस्य एवं सुदूरपश्चिम प्रदेश संसदीय दलका नेता डा.रणबहादुर रावल, पूर्व केन्द्रीय सदस्य सुनिलकुमार भण्डारी, पूर्व जिल्ला सभापति दीर्घराज भाट, राष्ट्रिय सभाका सदस्य नारायणदत्त मिश्र, प्रदेश सभा सदस्य डिल्लीराज पन्त, संविधान सभा सदस्य एवं पूर्व शिक्षा राज्यमन्त्री मोहनसिंह राठौर लगायतको सर्मथन रहेको बताइएको छ ।
जिल्ला अधिवेशनअन्तर्गत सोमबार भएको मतगणनामा सभापतिका तीन उम्मेदवारमध्ये कसैले पनि ५१ प्रतिशत मत कटाउन नसकेपछि दोस्रो चरणको मतदान हुने भएको हो । पहिलो चरणको निर्वाचनमा सभापतिका उम्मेदवार प्रकाशबहादुर बमले सबैभन्दा बढी मत ल्याएका थिए ।
उहाँले १ हजार १ सय ६९ मत ल्याउनु भएको थियो भने, सभापतिका अर्का उम्मेदवार भट्टले १ हजार ७२ र रामबहादुर कलेलले १९७ मत ल्याउनु भएको थियो । १०४ मत बदर भएका थिए । कुल २ हजार ५७६ जना प्रतिनिधि रहेकोेमा २ हजार ४८६ मत खसेको थियो ।
