कैलाली । कैलालीको बर्दगोरिया गाउँपालिकामा एक पुरुषको शव सडेको अवस्थामा फेला परेको छ । पालिकाको वडा नम्बर २ मा पर्ने बौनियाँ नालामा तैरिँदै गरेको अवस्थामा शव फेला परेको हो ।
सो शव पालिकाको वडा नम्बर २ का ४१ वर्षीय सकै चौधरीको रहेको इलाका प्रहरी कार्यालय बौनियाँले जानकारी दिएको छ । प्रहरीका अनुसार उनी माघ ३ गते देखी बेपत्ता थिए । उनको खोजीका लागी आफन्तले माघ ५ गते बौनियाँ प्रहरीमा निवेदन समेत दिएका थिए । बिहीबार बिहान उनको शव देखेपछि स्थानीयले प्रहरीलाई खबर गरेका थिए । उनको मृत्युको कारण भने खुल्न सकेको छैन ।
मादक पदार्थ सेवन गर्ने र मानसिक सन्तुलन त्यति ठिक नभएको भनेर निवेदन आएको थियो । इलाका प्रहरी कार्यालय बौनियाँका प्रमुख प्रहरी निरीक्षक महेश विक्रम शाहले भने… “शरीरमा चोटपटक पनि लागेको देखिँदैन । शव पूर्ण रूपमा सडेको अवस्थामा छ । मादक पदार्थ सेवनका कारण उनको मृत्यु भएको हुन सक्ने हाम्रो प्रारम्भिक अनुमान हो । यद्धपी घटनाको थप अनुसन्धान हुने नै छ ।” उनका अनुसार अहिले शव पोस्टमार्टमका लागी टिकापुर पठाइएको छ ।
