सुनसरी – प्रहरीले धरानबाट लागुऔषध गाँजासहित तीद्द जनालाई पक्राउ गरेको छ।पक्राउ पर्नेहरूमा धरान उपमहानगरपालिका-२० बस्ने ३४ वर्षीय कमल राई, २३ वर्षीय प्रदीप राई र धनकुटा साँगुरीगढी गाउँपालिका-९ बस्ने २० वर्षीय राजु विश्वकर्मा रहेका छन्।
अस्थायी प्रहरी चौकी बिष्णुपादुकाबाट खटिएको प्रहरीले धनकुटाबाट धरानतर्फ जाँदै गरेको को१ज ३१५८ नम्बरको पिकअपबाट उनीहरूलाई पक्राउ गरेको हो।
धरान उपमहानगरपालिका-२० खैरे खोलाबाट उनीहरू ५६ किलो ४ सय ५ ग्राम गाँजासहित समातिएको जिल्ला प्रहरी कार्यालय सुनसरीले जनाएको छ।
चार वटा बोरामा रहेको उक्त गाँजा फेला पारी चालक कमल, सहचालक राजु र पिकअपमा सवार प्रदीपलाई पक्राउ गरिएको उक्त कार्यालयले जनाएको छ।तीनै जनालाई हिरासतमा राखेर अनुसन्धान थालिएको प्रहरीले जनाएको छ।
