कैलाली । कैलालीको बर्दगोरिया गाउँपालिका अन्तर्गतका ६ वटै वडाका सामुदायिक विद्यालय र समुदाय स्तरमा लैङ्गिक हिंसाविरुद्धको १६ दिने अभियान मनाइएको छ । महिला, बालबालिका तथा ज्येष्ठ नागरिकमा सचेनतामूलक सन्देश प्रवाह गरी अभियान मनाइएको हो ।आज (सोमबार) गाउँपालिकाको वडा नं.३ मा महिला, बालबालिका तथा ज्येष्ठ नागरिकको सहभागितामा अभियान सञ्चालन गरिएको छ । यो वर्ष ‘लैंगिक हिंसा अन्त्यको सुनिश्चितताः महिला र बालबालिकामा लगानीको ऐक्यवद्धता’ भन्ने नाराका साथ अभियान मनाइएको हो ।
गाउँपालिकाको महिला तथा बालबालिका शाखाको आयोजनामा भएको कार्यक्रममा १ सय ४३ जनाको सहभागिता रहेको महिला विकास संयोजक पानमति कुमारी रानाले जानकारी दिइन् । यहि मंसिर ९ गतेदेखि सुरु भएको अभियान २४ गतेसम्म गाउँपालिकाका ६ वटै वडास्तरमा सञ्चालन हुनेछ ।
बर्दगोरिया वडा नं. ३ का वडाध्यक्ष मनऋषि आचार्यको सभाध्यक्षता भएको कार्यक्रमको प्रशिक्षण जयप्रकाश मल्लले गरेका थिए । प्रशिक्षक मल्लले लैंगिक हिंसा अन्त्यका लागि गरिएका प्रयासहरु, स्थानीयको भूमिका, पारिवारिक तथा समुदायमा हुने गरेका हिंसाका घटनाका बारेमा जानकारी दिएका थिए ।
कार्यक्रममा बोल्दै वडाध्यक्ष मनऋषि आचार्यले लैंगिक हिंसा अन्त्यका लागि सबै क्षेत्र, वर्ग, समुदाय र सम्बन्धित निकायको भूमिका महत्वपूर्ण हुने बताए । उनले वडास्तरमा रहेका महिला, बालबालिका तथा ज्येष्ठ नागरिकको शान्ति र सुरक्षाका लागि सहयोग गर्न सम्बन्धित सबैमा आग्रह समेत गरे ।
‘हरेक वर्ष लैंगिक हिंसाविरुद्धको अभियान सञ्चालन गरिए पनि कमि आउन सकेको छैन । उनले भने, ‘अझैपनि समाजमा विभिन्न अन्धविश्वासको आरोप महिला तथा बालबालिकामाथि हुने गरेका छन् । बालबिवाह, छाउपडी र दाइजो जस्ता कुप्रथा समाजमा विद्यमान रहेकाले महिला र बालबालिकाहरु विभिन्न हिंसा भोग्न बाध्य हुने गरेका छन् ।’
वडाध्यक्ष आचार्यले महिला तथा बालबालिकाको मानव अधिकारको संरक्षण गर्न, उनीहरुको सम्मानपूर्वक बाँच्न पाउने हक अधिकार सुनिश्चित गर्न यो अभियान आयोजना हुने गरेको बताए ।
यस्तै, कार्यक्रममा महिला विकास संयोजक पानमति कुमारी रानाले महिलाले आफ्नो जीवनकालमा कुनै न कुनै प्रकारको हिंसा भोगिरहेको बताइन् ।
उनले धेरैजसो हिंसा भने उनिहरुका निकट, प्रेमी, विश्वास पात्र या जीवन साथीबाट आपसी सम्बन्ध विश्वास नहुनु, जनचेतनाको कमी, गरीबी लगायतका समस्या मुख्य कारण भएको बताइन् । उनले हिंसा अन्त्य तथा न्यूनिकरणका लागि सबैको साथ, सहयोग र सहकार्य अनिवार्य रहेको बताइन् । नेपालमा २०५४ सालदेखि लैङ्गिक हिंसाविरुद्धको १६ दिने अभियान मनाउन थालिएको हो ।
