बौनियाँ,कैलालीमा लागू औषधसहित एक युवक पक्राउ परेका छन् । विशेष सूचनाका आधारमा ईलाका प्रहरी कार्यालय चिसापानीबाट खटिएको प्रहरी टोलीले लागूऔषध खैरो हिरोइनसहित सोमबार युवकलाई पक्राउ गरेको हो ।
चिसापानीबाट प्रहरी सहायक हवल्दार खम्मबहादुर बिष्टको नेतृत्वको टोलीले नीजलाई पक्राउ गरेको जिल्ला प्रहरी कार्यालय कैलालीले जनाएको छ । पक्राउ पर्नेमा मोहन्याल गाउँपालिका–७ बडिगाउँका १८ वर्षीय भावेश थापा रहेको प्रहरीले जनाएको छ ।
जिल्लाको लम्कीचुहा नगरपालिका–३ चिसापानीस्थित कर्णाली पुलमुनि लुकिछिपी बसेको अवस्थामा शंका लागेर चेकजाँच गर्दा प्रहरीले लागूऔषध फेला पारेको हो । लागूऔषधको कारोबार भइरहेको गोप्य सूचनाका आधारमा खटिएको प्रहरीको टोलीले थापालाई पक्राउ गरेको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) वेदप्रकाश जोशीले बताउनुभयो ।
डीएसपी जोशीकाअनुसार थापाको साथबाट हरियो रंगको प्लाष्टिक भित्र राखिएको १७ पोका ४६० मिलिग्राम लागू औषध खैरो हिरोइन बरामद गरिएको छ । थापालाई नियन्त्रणमा राखेर थप अनुसन्धान गरिरहेको प्रहरीले जनाएको छ ।
