काठमाडौँ । फागुन २६ लाई प्रदर्शन तोकेको फिल्म ‘रंगेली’ पछिल्लो समय खबरमा छ, सौगात मल्लका कारण । निर्माण टिमले सौगातलाई अतिथि भूमिकामा खेलाउन निर्माण टिमले प्रयत्न गरिरहेको तर सौगातले अनिच्छा व्यक्त गरेको केही समाचारमा उल्लेख छ ।तर निर्माण निकट स्रोतका अनुसार सौगातलाई अहिलेमात्र होइन पहिला पनि निर्माण टिमले फिल्म खेलाउने प्रयास गरेको थियो । खासमा अहिले दयाहाङले गरेको ग्याङस्टरको भूमिकाका लागि पहिलो रोजाइ सौगात नै थिए । तर सौगातले ‘रंगेली’मा गर्नुपर्ने जस्तो भूमिका पहिला नै धेरै चलचित्रमा गरिसकेको भन्दै फिल्म खेल्ने अनिच्छा व्यक्त गरेको, स्रोत बताउँछ ।
यो चलचित्रमा दयाहाङले थारु युवकको भूमिका निर्वाह गरेका छन् र सौगातले केही वर्ष पहिला रिलिज भएको ‘षडंग’मा लगभग यस्तै भूमिका निर्वाह गरेका थिए । तर मुख्य भूमिकामा नभए पनि चलचित्रको बजार मूल्य बढाउन निर्माण टिम अहिले सौगातलाई सानो भूमिकामा भए पनि अभिनय गराउन प्रयासरत छ । निर्माण टिमका एक सदस्यका अनुसार फिल्मको केही दिनको सुटिङ बाँकी छ । दयाको समय नमिल्दा यो हप्ता दिन जतिको सुटिङ निर्माण टिमले जगेडा राखेको छ । यही बेलामा सौगात पनि मिसाएर सुटिङ सक्ने निर्माण टिमको योजना छ । यसैका लागि निर्माण टिमले सौगातलाई ताकेता गरिरहेको छ । सौगातले यसका लागि स्क्रिप्टसँगै स्टोरी बोर्ड पनि मागेका छन् ।
सौगातको माग अनुसार निर्माण टिमले स्क्रिप्टसँगै स्टोरी बोर्ड पनि पठाइसकेको छ तर सौगातले यसपछि भने निर्माण टिमले गर्ने नगर्ने जवाफ दिइनसकेको पनि स्रोतले बताएको छ । यदि सौगातले केमियो गरे भने दया र सौगात एकै फिल्ममा हुने खबर त ठूलो नहोला तर यति मेहनत गरेर सौगात राख्दा दर्शकलाई सरप्राइज चाहिँ होला कि !
