भैरहवा। भैरहवामा हुन गइरहेको नवौं लुम्बिनी राष्ट्रिय महोत्सवमा अधिकांस स्टल बुक भएका छन् ।

सिद्धार्थ उद्योग वाणिज्य संघको आयोजनामा मंसिर २० गते देखि हुन गइरहेको पर्यटन महोत्सव कृषि तथा राष्ट्रिय औधोगिक व्यापारमेलामा ३ सय स्टल बनाइएकोमा मेला सुरु हुन अगावै सबै स्टल बुकिङ भइसकेका छन ।

बजारमा आर्थिक चलायमान गराउन उद्योगी व्यवसायीहरु उत्साहका साथ स्टल बुक गराएका छन हामीले साचेभन्दा बढि स्टलको माग भएको संघका बरिष्ठ उपाध्यक्ष एवं महोत्सव मूल आयोजक समिति सह–संयोजक नेत्रप्रसाद आचार्यले जानकारी दिए ।

उनले विगतको मेलाहरु भन्दा यस वर्षको मेलामा मेला सुरु हुनु भन्दा अगाडि नै स्टल बुक भएका छन । हामीले स्टल छैन भनि फर्काउनु पर्ने अवस्था आएको छ । कतिपयले त स्टल नपाएर धेरै विभिन्न ठाँउबाट व्यवस्थापनको लागि पहल गरिरहनु भएको छ । आयोजकलाई स्टलको व्यवस्थापन गर्न धौ धौ भएकोले थप स्टल बनाउने की भन्ने सोचमा आयोजक रहेको स्टल बुकिङ ब्यवस्थापन समिति संयोजक समेत रहेका आचार्यले भने

उनले संघले यसअघि सम्पन्न गरेका ८ वटा महोत्सवमा समेत स्टल बुकिङ राम्रो हुने गरेको स्मरण गरे । ‘यसपटक बजारमा आर्थिक मन्दीको प्रभाव छ । उपभोक्ता र व्यवसायीको क्रय शक्ति केही खस्किएको छ तर महोत्सवप्रतिको विश्वास कायम छ । यसले बजारमा नयाँ उत्साह थपेको हामीले पाएका छौं ।’

आफ्नो उत्पादन तथा सेवाको बिक्री बितरण तथा प्रचारप्रसार गर्न हिमाली तथा पहाडी जिल्लाका कृषक र निजी व्यवसायीको समेत महोत्सवमा स्टल बुकिङ राम्रो छ । आर्थिक मन्दीले निजी क्षेत्रका व्यवसायी निराश भएको अवस्थामा उक्त महोत्सवमा भने उद्यमी व्यवसायीको बढ्दो आकर्षण र सहभागिताले आयोजक उत्साहित भएका छन् । पुस १ गतेसम्म भैरहवास्थित अंचलपुरमा महोत्सव हुँदैछ ।

‘स्टल बुक गर्न भन्दै धेरै ठाउँबाट फोन आएको आयै छ’, आचार्यले भने, ‘स्टलको माग भए अनुरुप हामीले उपलब्ध गराउन सक्ने अवस्था छैन ।’ महोत्सवमा प्रतिस्टल १५ हजारदेखि ४० हजार रुपैयाँ मूल्य तोकिएको छ । महिला उद्यमी, हस्तकलालाई ५० प्रतिशत छुट छ । कृषि उत्पादनलाई प्रोत्साहित गर्न प्रधानमन्त्री कृषि आधुनिकरण परियोजनाबाट सिफारिश भएका कृषकका लागि निःशुल्क स्टल उपलब्ध गराइएको छ ।

संघका अध्यक्ष तथा महोत्सव मूल आयोजक समिति संयोजक ठाकुरकुमार श्रेष्ठले काठमाडौं, पोखरा, चितवन, झापा, पश्चिम नवलपरासी, कपिलवस्तु, दाङ, बुटवल, भैरहवा, पाल्पादेखि कर्णाली प्रदेशका जिल्लाहरु दैलेख, सुर्खेत, सुदूरपश्चिमका कैलाली, कंचनपुर तथा मनाङ–मुस्ताङका जिल्लाहरुबाट किसान तथा व्यवसायीले स्टल बुक गरेका छन् । हिमाली तथा पहाडी जिल्लाबाट स्याउ, जडिबुटी, आलु, सेमी तथा विभिन्न गेडागुडी जस्ता कृषिजन्य बस्तुको बिक्रीका लागि स्टल बुक भएको श्रेष्ठले जनाए ।

आयोजकका अनुसार अहिलेसम्म ४० बढी जिल्लाबाट उद्योगी–व्यवसायी, कृषक र केही संघसंस्थाले समेत स्टल बुकिङ गरेका छन् । ‘एउटै थलोमा धेरै उत्पादनको प्रदर्शनी हुने भएकाले पनि यति धेरै जिल्लाका व्यवसायी र कृषकले महोत्सवमा आउन चाहनुभएको हो’, अध्यक्ष श्रेष्ठले भने, ‘यो अत्यन्त सुखद् पक्ष हो । हामीलाई यो महोत्सवले थोरै भए पनि वर्तमान आर्थिक सिथिलतालाई चिर्छ भन्ने विश्वास बढेको छ ।’

आयोजकका अनुसार महोत्सवको प्रायोजन तथा सह–प्रायोजन गर्नका लागि पनि धेरै उद्यमी–व्यवसायी र ठूला प्रतिष्ठान उत्साहित देखिएका छन् । ‘आर्थिक मन्दीले निराश बनाएको अवस्थामा पनि यो महोत्सवप्रति किसानदेखि व्यवसायी र उद्योगीको बढ्दो आकर्षणले हामीलाई हौसाएको छ’, संघका महासचिव कृष्णप्रसाद घिमिरेले भने, ‘बिगतमा प्रायोजन तथा सहप्रायोजन गरिदिने व्यवसायी पाउनै मुस्किल हुन्थ्यो । अहिले धेरैले इच्छा देखाउनु भयो ।’ संघका सचिव तथा प्रसार प्रसार समिति संयोजक मंगल भण्डारीले महोत्सवले व्यवसायिक प्रबद्र्धन गर्ने र सहरदेखि गाउँबस्तीसम्म प्रचारप्रसार राम्रो भएकाले धेरै जिल्लाका उत्पादन भैरहवामा विक्रीका लागि ल्याइन लागेको जनाए ।