काठमाडौँ । बलिवुड अभिनेत्री कियारा आडवाणीले आफ्नो गर्भवती भएको घोषणा गरेर फ्यानहरूलाई खुसीको खबर दिएकी छिन् । तर, यसले फरहान अख्तर निर्देशित आगामी फिल्म डन-३ लाई भने असर पारेको छ । मिडिया रिपोर्टका अनुसार कियारा आडवाणीले परिवारको लागि फिल्मबाट ब्रेक लिने भएपछि उनले फिल्म डन-३ छोडेकी छिन् ।

कियाराले हाल टक्सिक र वार २ को छायांकन समेट्दै गरेको बताइएको छ । यसपछि, उनी आफ्नो परिवार र आफ्नो हुने बच्चाको लागि समय निकाल्न चाहन्छिन् । यसका लागि उनी फिल्मबाट ब्रेक लिनेछिन् । उनको निर्णयलाई डन- ३ का निर्माताहरूले सम्मान गरेको र अब यो फिल्मको लागि नयाँ अभिनेत्रीको खोजी सुरु भएको बताइएको छ ।कियारा आडवाणीले हालै सामाजिक सञ्जालमा आफ्नो गर्भवती भएको घोषणा गरेकी थिइन् । उनले एउटा तस्वीर पोस्ट गर्दै, हाम्रो जीवनको सबैभन्दा सुन्दर उपहार आउन लागेको लेखेकी थिइन् ।

कियारा आडवाणी यस वर्ष रिलिज हुने फिल्म वार २ को छायांकन गरिरहेकी छिन् । यसबाहेक उनी केजीएफ स्टार यशसँग फिल्म टक्सिकमा देखिनेछिन् । यसबाहेक, उनीसँग दिनेश विजन निर्देशित हरर कमेडी शक्ति शालिनी पनि छ । रिपोर्टका अनुसार, कियाराले सुत्केरी बिदाबाट फर्केपछि शक्ति शालिनीको छायांकन सुरु गर्नेछिन् । धूम ४ मा रणवीर कपूरसँगै कियारालाई कास्ट गरिने खबर पनि आएको थियो।

फरहान अख्तर निर्देशित फिल्म डन- ३ को छायांकन २०२४ को अन्त्यसम्ममा सुरु हुने भनिएको थियो, यद्यपि यो स्थगित गरिएको थियो । अब कियाराले फिल्म छोडेपछि फिल्मको छायांकन फेरि स्थगित हुन सक्ने बताइएको । यस फिल्ममा रणवीर सिंह मुख्य भूमिकामा छन् भने विक्रान्त मेस्सी नकारात्मक भूमिकामा देखिनेछन् । यसअघि दुवै कलाकारले २०१३ मा रिलिज भएको फिल्म लुटेरामा सँगै काम गरिसकेका छन् ।

डन फ्रान्चाइजीको पहिलो भागमा अमिताभ बच्चन डनको भूमिकामा देखिएका थिए । यो चलचित्र १२ मे १९७८ मा सिनेमाघरहरूमा रिलिज भएको थियो । जबकि, फिल्मको दोस्रो भाग २००६ मा रिलिज भएको थियो । फिल्ममा शाहरुख खानसँग प्रियंका चोपडा मुख्य भूमिकामा देखिएकी थिइन् । यस फिल्मको सिक्वेल डन-३ हो । यो फिल्मलाई फरहान अख्तरले निर्माण र निर्देशन गर्दैछन् ।