कैलाली । “स्वास्थ्य, विकास र समृद्धिका लागि खेल” भन्ने मुल नाराका साथ कैलाली जिल्लाको बर्दगोरिया गाउँपालिकामा सातौँ संस्करण खुल्ला राष्ट्रव्यापी भलिबल प्रतियोगिता आज दोस्रो दिन तीनवटा खेल सम्पन्न भएका छन् । आज बिहान भएको पहिलो खेलको पहिलो सेटमा केदार टुर एण्ड ट्राभल्सले चन्द्र सूर्य युवा क्लबलाई २–० को सेटमा हरायो । केदार टुर एण्ड ट्राभल्सले २५–१२ र २५–१४ ले लिँदै चन्द्र सूर्य युवा क्लब माथि जित निकाल्यो । केदार टुर एण्ड ट्राभल्सले चन्द्र सूर्य युवा क्लबलाई हराउँदै क्वाटर फाइनल प्रवेश गरेको छ।

यस्तै, आजै दिउँसो भएको अर्को खेलमा जगदम्बिके भगवती माध्यमिक विद्यालयलाई हराउँदै जानकी गाउँपालिका क्वाटर फाइनलमा प्रवेश गरेको छ। जानकी गाउँपालिकाले जगदम्बिके भगवती माध्यमिक विद्यालयलाई २–० को सेटमा हराएको थियो। जानकी गाउँपालिकाले जगदम्बिके भगवती माध्यमिक विद्यालयलाई पहिलो सेटमा २५–१६ ले हराएको थियो। जानकी गाउँपालिकाले अन्तिम सेटमा २५–२२ को जित निकाल्यो।

आजै साँझ भएको अर्को खेलमा सुन्दरपुर युवा क्लबलाई हराउँदै शिवहरी युवा क्लबले जित हासिल गर्दै क्वाटर फाइनल प्रवेश गरेको छ। खेलमा शिवहरी युवा क्लबले सुन्दरपुर युवा क्लबलाई ३–१ को सेटमा हराउँदै क्वाटर फाइनल प्रवेश गरेको छ। सुन्दरपुर युवा क्लबले शिवहरी युवा क्लबलाई पहिलो सेटमा २५–२२ ले हराएको थियो। दोस्रो सेटमा भने सुन्दरपुर युवा क्लब १९–२५ ले पराजित भयो। तेस्रो सेटमा शिवहरी युवा क्लबले सुन्दरपुर युवा क्लबलाई २५–२२ ले जित निकाल्यो।

प्रतियोगितामा प्रथम हुने टिमलाई १ लाख ३ हजार १ सय ५१ रुपैयाँसहित शिल्ड, मेडल र प्रमाणपत्र पुरस्कार पाउनेछन्। दोस्रो टिमलाई ४७ हजार १ सय ५१ रुपैयाँसहित शिल्ड, मेडल र प्रमाणपत्र पुरस्कार पाउनेछन् । र तृतिय टिमलाई ३१ हजार १ सय ५१ रुपैयाँ पुस्कारसहित शिल्ड, मेडल र प्रमाणपत्र पुरस्कार दिईने क्लबका अध्यक्ष गोविन्द बहादुर बुडाक्षेत्रीले जानकारी दिए । भलिबल खेलमा बेस्ट स्पाईकर,बेष्ट सर्भर, बेष्ट ब्लकर, बेष्ट सटर , बेष्ट प्लेयर लगायतका बिधामा पनि छुट्टै पुरस्कारको व्यवस्था गरिएको आयोजकले जनाएको छ ।

प्रतियोगिताका विभिन्न ६ विधाका उत्कृष्ट खेलाडीलाई नगद ७ हजार ५ सय रुपैयाँसँगै मेडल र प्रमाणपत्र पुरस्कार प्रदान गरिनेछ । अनुशासित खेलाडीलाई मायाको चिनोबाट सम्मानित गरिने छ । बर्दगोरिया गाउँपालिकाको मुख्य प्रवर्द्धक रहेकोे प्रतियोगिताको मुख्य प्रायोजक बर्दगोरिया गाउँपालिका वडा नं ३ को वडा कार्यालय रहेको छ। हिजोदेखि सुरु भएको प्रतियोगिता चैत ३ गतेसम्म सञ्चालन हुनेछ ।

साइनिङ्ग स्टार युवा क्लबले लामो समयदेखि शिक्षा, स्वास्थ, पुर्वाधार विकास, मनोरञ्जन तथा खेलकुद क्षेत्रमा केन्द्रित भएर सामाजिक कार्यहरु गर्दै आइरहेको छ । खेलकुदको विकासका लागि सबै एकजुट हुनपर्ने आयोजकको भनाइ छ । स्थानीय तथा राष्ट्रिय खेलाडीको सशक्तिकरण र क्षमता अभिवृद्धि गर्ने उद्देश्य अनुरुप क्लबले भलिबल प्रतियोगिता आयोजना गर्दै आएको आयोजकको भनाइ छ । खेलकुद क्षेत्रले बहुआयामिक महत्व राख्ने भएकाले स्वास्थ्य, मनोरञ्जन र विकाससँगै सामाजिक एकता, सद्भाव र पहिचान अभिवृद्धिमा टेवा पुग्ने विश्वास गरिएको छ ।

यस अघि रामजानकी मन्दिर संरक्षण समितिले चौथो संस्करणसम्म भलिबल प्रतियोगिता गर्दै आएपनी साईनिङ्ग स्टार युवा क्लबको आयोजनामा यो सातौँ खुल्ला राष्ट्रव्यापी भलिबल प्रतियोगिता हो । हरेक वर्ष फागुपूर्णिमा होलीको अवसरमा आयोजना हुँदै आएको प्रतियोगितामा देश तथा छिमेकी देश भारतबाट राष्ट्रिय तथा अन्तर्राष्ट्रिय ९ टोलीको सहभागिता रहेको आयोजक क्लबका अध्यक्ष बुडाक्षेत्रीले बताए ।