सिरहा, जिल्लामा उपभोक्ता हित संरक्षण गर्ने उद्देश्यले निरन्तर रूपमा बजार अनुगमन गरिएको छ । यसक्रममा मङ्गलबार लहान क्षेत्रमा र आज धनगढीमाई नगरपालिकाको बजार क्षेत्रमा अनुगमन गरिएको हो । वाणिज्य, आपूर्ति तथा उपभोक्ता संरक्षण कार्यालय वीरगञ्ज, इलाका प्रशासन कार्यालय लहान, घरेलु तथा साना उद्योग कार्यालय सिरहाको संयुक्त टोलीले बजार अनुगमन गरेको हो ।
अनुगमनका क्रममा म्याद नाघेका उपभोग्य सामग्री नष्ट गर्नुका साथै बिना बिलबिजक सामान राख्ने तथा व्यवसाय गर्न लिएको अनुमति बाहेकका वस्तु बिक्री गर्ने पसललाई कारबाही गरिएको वाणिज्य, आपूर्ति तथा उपभोक्ता संरक्षण कार्यालय वीरगञ्जका अधिकृत सुनिल चौरासियाले जानकारी दिनुभयो । उहाँले भन्नुभयो, “अनुगमनका क्रममा म्याद नाघेका सामान नष्ट गरिनुका साथै नियमविपरीत व्यवसाय सञ्चालन गर्ने पसललाई जरिवाना गरिएको छ ।”
अनुगमनका क्रममा लहान-६ स्थित प्रेम ट्रेडर्सलाई रु १० हजार जरिवाना गरिएको छ भने लहान–६ को रमजान किराना स्टोर, विशाल किराना पसल, खुश्बु किराना पसल र राधा जनरल सप्लायर्सलाई जनही रु पाँच हजारका दरले जरिवाना गरिएको छ । जय माँ किराना पसललाई भने सामान्य सचेतिकरण गरिएको उहाँले बताउनुभयो ।
आज धनगढीमाई नगरपालिकाको बजार क्षेत्रमा तीन वटा कस्मेटिक पसल, दुई वटा किराना पसल, दुई वटा जुत्ताचप्पल पसल र एउटा कपडा पसलमा अनुगमन गरिएको छ । अनुगमनका क्रममा कुनै पनि पसललाई जरिवाना नगरी व्यापारीलाई सचेतीकरण मात्र गरिएको अधिकृत चौरासियाले बताउनुभयो ।
सुधार गर्ने उद्देश्यले नियमित अनुगमनअन्तर्गत गरिएको जनाउँदै आगामी दिनमा सिरहा सदरमुकामसहित अन्य बजार क्षेत्रमा पनि अनुगमनलाई निरन्तरता दिइने उहाँले बताउनुभयो । अनुगमनका क्रममा कतिपय पसल सञ्चालकले सटर बन्द गरी असहयोग गरेका पनि पाइएको अधिकृत चौरासियाले उल्लेख गर्नुभयो ।
यस सम्बन्धमा धनगढीमाई नगर उद्योग व्यापार सङ्घका अध्यक्ष सरोजकुमार महतोले व्यापारीहरू डराएर अनुगमनलाई असहयोग गर्नुपर्ने कारण नरहेको बताउनुभयो । व्यवसाय दर्ता तथा नवीकरण गरेर नियमअनुसार व्यवसाय सञ्चालन गर्नुपर्ने उल्लेख गर्दै उहाँले सामान्य त्रुटी भए अनुगमनका क्रममा सुधार गर्ने अवसर पाइने भएकाले नियमनकारी निकायलाई सहयोग गर्न व्यापारीलाई आग्रह गर्नुभयो । राष्ट्रिय समाचार समिति (रासस)
