बौनियाँ,कैलाली-टीकाराम साउँद/जिल्लाको बर्दगोरिया गाउँपालिका–५ कोईली भुरुवामा नवनिर्मित वडा कार्यालय भवनको उद्घाटन गरिएको छ । सुविधा सम्पन्न भवनको एक औपचारिक कार्यक्रमका बिच उद्घाटन गरिएको हो ।
बर्दगोरिया गाउँपालिका वडा नं ५ का वडा सचिव शेर बहादुर बडायकको स्वागत मन्तव्य संगै सुरू भएको कार्यक्रममा नवनिर्मित भवनको गाउँपालिकाका अध्यक्ष कर्ण बहादुर कुँवरले उद्घाटन गरेका हुन् । भवनको उद्घाटन गर्दै अध्यक्ष कुँवरले सेवा प्रवाहमा भवन निर्माणले महत्वपूर्ण टेवा पुग्ने बताए । जनताका सेवा र सुविधाका निम्ति वडा कार्यालयको आफ्नै भवन हुनुपर्ने बताउनुभएको छ । बर्दगोरिया गाउँपालिका वडा नं ५ को नवनिर्मित वडा कार्यालय भवनको सोमवार उद्घाटन गर्दै उहाँले जनप्रतिनिधिलाई जनताको काममा विशेष ध्यान दिन आग्रह गर्नुभयो ।
उनले प्रत्येक वडामा आफ्नै कार्यालय भवन निर्माण गरी सेवा दिने योजना अनुरूप कार्यालय भवन निर्माण गरिएको बताए । सुविधा सम्पन्न भवन नहुँदा सेवाप्रवाहमा समस्या भएको भन्दै अध्यक्ष कुँवरले अब भवन निर्माणसँगै सेवा प्रवाह पनि सहज हुनेमा विश्वास व्यक्त गरे । गाउँपालिकाले भौतिक पूर्वधार निर्माणसँगै शिक्षा, स्वास्थ्य, कृषि जस्ता क्षेत्रमा पनि प्राथमिकताका साथ काम गर्ने अध्यक्ष कुँवरले बताए ।
कार्यक्रममा गाउँपालिका उपाध्यक्ष गणेशराज गिरी (लालदिप)ले वडा कार्यालय व्यवस्थित नभएसम्म वडा तहको कार्य सम्पादन व्यवस्थित हुन नसक्ने भन्दै नवनिर्मित वडा कार्यालयको भवनबाट सेवाग्राहीले अब सहज रुपमा सेवा प्राप्त गर्ने बताउनु भयो । उनले यस अघि साँघुरो भवनबाट सेवा प्रवाह गरिरहनु परेकोले सेवाप्रवाह समेत चुस्त हुन नसकेको अवस्थामा भवन निर्माण भएसँगै कर्मचारी र सेवाग्राहीलाई सहज हुनेमा विश्वास व्यक्त गर्नुभयो । गुणस्तरीय सेवा दिएर जनतालाई सहज बनाउने योजना अनुरुप वडा कार्यालयको आफ्नै भवन निर्माण गरिएको बताए । उनले कर्मचारीहरुलाई सुविधा सम्पन्न भवनको पूर्ण रुपमा प्रयोग गरी आमनागरिकलाई सेवा दिन आग्रह गरे ।
वडाध्यक्ष भोलेराम चौधरीले सहज सेवाप्रवाहको माध्यम भनेकै भवन भएकाले नवनिर्मित भवनबाट अब सहज सेवा प्रवाह गर्न सकिने बताए । वडाध्यक्ष चौधरी आफ्नै भवन निर्माण भएकाले खुशी व्यक्त गर्दै अब वडावासीले सेवालिन आउँदा दुख भोग्नु नपर्ने बताए । करिब १ करोड २८ लाख ४० हजार ८ सय ९० रूपैयाँ अनुमान लागतमा भवन निर्माण भएको बर्दगोरिया गाउँपालिकामा प्रविधिक शाखाका असिस्टेन् सब-इन्जिनियर अविसेक रिमालले वैज्ञानिक मिडियालाई बताए ।
छ वटा वडा रहेको बर्दगोरिया गाउँपालिकामा वडा नं. २ र ३ का वडा कार्यालय बनिसकेका छैनन् । वडा नं २ र ३ को वडा कार्यालय भवन बहालमा लिई प्रयोग भइरहेको छ ।
कार्यक्रममा बर्दगोरिया गाउँपालिकाकाका वडा नं २ का वडाध्यक्ष गोविन्द विक र वडा नं ३ का वडाध्यक्ष मनऋषि आचार्य लगायत को सहभागिता रहेको थियो । कार्यक्रमको सञ्चालन पत्रकार भीम वीसिले गर्नु भएको थियो ।
भिडियो सहित
