लम्की । कैलालीको लम्की साना सहरी खानेपानी उपभोक्ता तथा सरसफाई संस्था लि. लम्कीको महत्वकांक्षी योजना ‘कर्णालीको पानी लम्कीवासीलाई’ दोस्रो चरणको कामको आइतबार शिलान्यस भएको छ । नेपाल सरकारका खानेपानी मन्त्री प्रदीप यादवले आज लम्कीचुहा नगरपालिकाका नगर प्रमुख सुशीला शाही, लम्की खानेपानी संस्थाका अध्यक्ष तेज बहादुर चलाउने लगायतको उपस्थितिमा उक्त आयोजना शिलान्यस गरेका हुन् ।
२९ करोड लागतमा निर्माण हुन लागेको योजनाको शिलान्यास गर्दै मन्त्री यादवले लम्कीचुहा नगरपालिकाको खानेपानीको समस्या स्थायीरूपमा सामाधान गरिने बताएका छन् ।
‘लम्कीचुहा नगरपालिकामा आज मैले आयोजनाको उद्घाटन गर्दा मैले सम्मान सहित गहिरो जिम्मेवारी महसुस गरेको छु । सामाजिक न्याय र समावेशी तरिकाले हामीले काम गरिरहेका छौँ,’ मन्त्री यादवले भने, ‘हामी घोषणा भन्दा पनि कार्यान्वयनमा ध्यान दिन्छौँ । लम्कीचुहा नगरपालिकामा आज दोस्रो चरणको कामको लागि शिलान्यास गरेका छौँ । लम्कीचुहा नगरपालिकाको खानेपानीको समस्या स्थायी रुपमा सामाधन हुने छ ।
साथै, मन्त्री यादवले लम्कीचुहा नगरपालिकामा ढल निर्माण तथा नाला व्यवस्थापनका लागि लम्कीचुहा नगरपालिकाले गरेको आग्रहलाई स्वीकार गर्दै ७७ करोड रूपैयाँ योजनालाई एशियाली विकास बैंक(एडिवि)मा पठाइसकेको र उक्त योजना ठेक्का हुने चरणमा रहेको समेत जानकारी दिए ।
कार्यक्रमकी विशिष्ट अतिथि तथा लम्कीचुहा नगर प्रमुख सुशीला शाहीले लम्कीचुहा नगरपालिका र खानेपानी मन्त्रालयको पारिवारिक सम्बन्ध जस्तै रहेको बताइन् । आमपानीमा सानो ट्यांकीबाट सुरुवात भएको लम्की खानेपानीको योजनालाई चुनावमा बाचा गरेजस्तै कर्णालीको पानी लम्कीवासीलाई कार्यान्वयनमा भूमिका खेल्ने मन्त्री यादव र मन्त्रालय धन्यवाद व्यक्त गरेकी छन् ।
त्यस्तै लम्की साना सहरी खानेपाी उपभोक्ता तथा सरसफाइ सँस्थाका अध्यक्ष तेज बहादुर चलाउनेले खानेपानी आयोजनको शिलान्यस केवल एउटा संरचना निर्माणको आरम्भ मात्र नभएर लम्कीचुहावासीको स्वास्थ्य, स्वच्छता र समृद्धिको शिलान्यस भएको बताए ।
‘वि.सं. २०४९ बगर्दा खानेपानीको रुपमा भई १ सय २० धाराबाट सुरुवात भएको आयोजनाको २०६२ सालमा कुल आयोजनाको ५० प्रतिशत नेपाल सरकारको अनुदान, ३० प्रतिशत नगर विकास कोषबाट ऋण र बाँकी उपभोक्ताबाट २० प्रतिशत नगद तथा श्रमदान गरि कुल रकम ७ करोड ९१ लाख ४१ हजार ९ सय ५३ संरचना निर्माण गर्ने गरि लम्की साना सहरी खानेपानी उपभोक्ता तथा सरसफाइ सँस्था नामाकरण गरी सञ्चालनमा आएको हो,’ अध्यक्ष चलाउनेले भने, ‘पानीमा अध्याधिक चुनाका कारण समस्या उत्पन्न भएकाले कर्णालीको नदीको पानी ल्याई वितरण गर्ने योजनालाई ०७६ सालमा डीपीआर गरी २०८० सालबाट कामको सुरुवात भएको छ । त्यसतै अनुसार पहिलो चरणको काम सम्पन्न भएर दोस्रो चरणको कामको लागि आज शिलान्यास भएको छ । खानेपानी आयोजनको शिलान्यस केवल एउटा संरचना निर्माणको आरम्भ मात्र नभएर लम्कीचुहावासीको स्वास्थ्य, स्वच्छता र समृद्धिको शिलान्यस पनि हो ।’
पहिलो चरण अन्तरगत १४ करोड ७७ लाखको बजेटबाट बल्चौरमा ५ वटा कुवा निर्माण, साढे चार लाख लिटर क्षमताको रिजर्भ ट्यांकी, ३५ सय मिटर पाइपलाइन विस्तार, ओभरहेड ट्यांकी र प्रशासनिक भवन निर्माणको ९० प्रतिशत पूरा भएको कार्यालय प्रमुख ढकालका बताउँछन् ।
शिलन्यास हुने दोस्रो चरणको कामको ठेक्का सम्झौता भइसकेको छ ।
कार्यालय प्रमुख जगनाथ ढकालका अनुसार आज शिलान्य भएको आयोजनको लागि सुप्रिम जय माता जे.भी. काठमाण्डौंसँग २९ करोड ४८ लाख ३२ हजार ४९९ रुपैयाँमा ठेक्का भएको छ । २०८२ असार २३ मा सम्झौता भएको दोस्रो चरणको योजनामा साढे चार लाख लिटर क्षमता भएका दुईवटा ओभर हेड ट्यांकी, पानी प्रशोधन केन्द्र, आठ किलोमिटर मुख्य पाइपलाइन र ३६ किलोमिटर सहायक पाइपलाइन विस्तारको काम हुने छ । । यो काम २०८५ साल असारभित्र सम्पन्न गर्ने लक्ष्य राखिएको छ ।
अब तेस्रो चरणको काम हुन बाँकी छ । तेस्रो चरणको काम सम्पन्न भएसँगै कर्णालीको पानी लम्कीवासीलाई योजनाले पूर्णता पाउने छ, र १५ हजार घरधुरीमा २४ सैं घण्टा कर्णालीको पानी लम्कीवासीका घरको धारामा पुग्ने छ ।
२०७६÷७७ सालमा लम्कीचुहा नगरपालिका अन्तरगतको वडा नं. १,२,३ को बल्चौर,व्यवस्थितनगर र वडा नं. ५ को राजीपुर क्षेत्रका करिब १५ हजार घरधुरीमा कर्णाली पानी पुगाउने उदेश्यका साथ डीपीआर गरिएको थियो । तत्कालिन समयमा ९० करोड लागत अनुमान गरिएको कर्णालीको पानी लम्कीवासीलाई खानेपानी योजनालाई तीन चरणमा विभाजन गरि निर्माण कार्यको सुरुवात २०८० फागुनबाट गरिएको हो ।
कुल लागतको ७० प्रतिशत नेपाल सरकार, २५ प्रतिशत स्वयं खानेपानी सँस्था र बाँकी रहेको ५ प्रतिशत सम्बन्धि स्थानीय सरकारले व्यहोर्ने गरि सह लागनीमा योजनाको निर्माण भइरहेको छ ।
