कैलाली । कैलालीको बर्दगोरिया-३ स्थित जगदम्बिके भगवती मावि रानीकुण्डाले आफ्नो स्थापनाको ४४ औं अभिभावक दिवस तथा दोस्रो वार्षिकोत्सव भव्यताका साथ मनाएको छ । बर्दगोरिया गाउँपालिका अध्यक्ष कर्णबहादुर कुँवरको प्रमुख आतिथ्यमा वार्षिकोत्सव मनाइएको हो ।
सो अवसरमा गाउँपालिका अध्यक्ष कुँवरले विद्यालय शैक्षिक विकासका लागि गाउँपालिकाले बजेट विनियोजन गरेको बताए ।
विद्यालयमा भवन निर्माणका लागि बजेट विनियोजन गरेको बताउँदै उनले घेरापर्खालका लागि समेत गाउँपालिकाले सहयोग गर्ने प्रतिबद्धता जनाए ।
‘गतवर्ष पनि बजेटका लागि पहल भएको हो, व्यवस्थापन समिति र प्रशासनले बजेट मागका लागि समयमै फायल पेश नगर्दा भवन निर्माण हुन सकेन ।,’ अध्यक्ष कुँवरले भने, ‘यसवर्ष गाउँपालिका र प्रदेशको संयुक्त लगानीमा भवनको तला थप लागि ठेक्का प्रक्रिया समेत भइसकेको छ । यसवर्ष भित्र भवन निर्माण हुन्छ ।’ गाउँपालिकाले शिक्षा, स्वास्थ्य र खानेपानीलाई प्राथमिकता दिएर काम गरिरहेको उनले बताए । विद्यालय व्यवस्थापन समितिका अध्यक्ष रामबहादुर चौधरीको सभापतित्वमा सुरु भएको दोस्रो वार्षिकोत्सवको सञ्चालन शिक्षक भुपेन्द्रबहादुर राष्कोटी र कक्षा ११ की छात्रा रेखा थापाले गरेकी थिइन् । वार्षिकोत्सवमा विद्यालयले शिक्षाक्षेत्रमा योगदान दिएको भन्दै वडा अध्यक्ष मनऋषि आचार्य र विद्यालयका पूर्व लेखापाल तथा शिक्षक अभिभावक संघका अध्यक्ष गोविन्द बहादुर बुडाक्षेत्रीलाई दोसल्ला, कदरपत्र र मायाको चिनो दिएर सम्मानित गरेको छ ।
समारोहमा विद्यालयका शिक्षक विष्णुदत्त पन्त, भुपेन्द्रबहादुर राष्कोटी, गुड्डीदेवी सुनार, लक्ष्मी कुमारी बिनाडी, पूर्व विद्यार्थी तथा नेपाली सेनाका जवान नारायण खत्री सम्मानित भएका थिए । त्यस्तै, कुन्तीदेवी न्यौपाने प्रतिष्ठानबाट सञ्चालित अक्षयकोषबाट २० जना जेहन्दार छात्र र छात्राहरुलाई जनही ३ हजारले छात्रवृत्ति प्रदान गरिएको छ ।
विद्यालयका प्रधानाध्यापक नेत्रबहादुर खड्काले विद्यालयको प्रगति प्रतिवेदनसँगै आगामी योजना तथा कार्यक्रम पेश गरेका थिए । प्रअ खड्काले आफ्नो कार्यकालमा विद्यालयको मुहार फेरिने ढंगले काम गर्ने बताए ।
अतिथिले विद्यार्थीले तयार गरेका विज्ञान प्रदर्शनी, चित्रकला, हस्तकलाको अवलोकन गरेका थिए । त्यस्तै, विभिन्न स्थानीय थारु, मगर समुदायको पहिचान झल्किने भाषाभाषीका नृत्य, साँस्कृतिक प्रस्तुति गरिएको थियो । लोक तथा दोहोरी गायिका निर्मला भण्डारीले लोकदोहोरी गीत मार्फत मनोरञ्जन दिएकी थिइन् ।
वार्षिकोत्सवमा समाजसेवी नन्दाराम बिष्ट, दलबहादुर तिरुवा, चक्रबहादुर बिष्ट, बसन्त मुरारी नमुना माविका विव्यस अध्यक्ष टंकबहादुर कुँवर, प्रअ ताराप्रसाद जोशी, मोतिभागीरथी आविका निमित्त प्रअ शिवराज गौतम लगायतले शुभकामना मन्तव्य राखेका थिए ।
