कैलाली । पछिल्लो समयमा उपहारका रूपमा बीमा पोलिसी दिने प्रवर्द्धन तीव्र रूपमा वृद्धि हुँदै गएको छ। बदलिँदो समयसँगै जन्मदिन, विवाह, विभिन्न उत्सव तथा विशेष अवसरमा जिन्सी सामान, गहना वा भोज–पार्टीकै सट्टा दीर्घकालीन सुरक्षित विकल्पका रूपमा बीमा पोलिसी उपहार दिने चलन फैलँदो छ।
यही सकारात्मक अभ्यासलाई अवलम्बन गर्दै घोडाघोडी नगरपालिका–३, कैलालीका पत्रकार खेम ढुङ्गानाले आफ्ना छोरा भूपेन्द्र ढुङ्गानाको पाँचौँ जन्मदिनमा ‘सुनौलो बाल समृद्धि जीवन बीमा’ पोलिसी उपहार दिएका छन्। सन नेपाल लाइफ इन्स्योरेन्स, लम्की शाखामार्फत उनले १० लाख रुपैयाँ बीमाङ्कको उक्त पोलिसी खरिद गरेका हुन्।
ढुङ्गानाका अनुसार क्षणिक खुशी दिने जिन्सी उपहार वा फजुल भोज–पार्टीले स्थायी मूल्य सिर्जना गर्दैन। उनले भने, “वस्तु–सामानले एकछिनको मात्रै खुशी दिन्छ, तर बीमा पोलिसी भने बचत, भविष्य निर्माण, जोखिम न्यूनीकरण र आपतमा राहत दिने सबैभन्दा प्रभावकारी औजार हो। बीमाले आर्थिक सुरक्षाको ग्यारेन्टी गर्ने भएकाले छोरालाई बीमा पोलिसी उपहार दिने निर्णय गरेँ।”
बीमा उपहार संस्कृतिले परिवारलाई दीर्घकालीन सुरक्षा, आपतकालीन सहयोग र व्यवस्थित वित्तीय योजना बनाउँदै जाने सकारात्मक प्रवृत्ति विकास गर्न मद्दत गरिरहेको छ।
