कर्णाली, सुर्खेत वीरेन्द्रनगरमा ‘दोस्रो प्रादेशिक मह महोत्सव’ भोलिदेखि सुरु हुने भएको छ । नेपाल मौरीपालक महासङ्घ कर्णाली प्रदेशले यही माघ १–३ गतेसम्म महोत्सव आयोजनाको तयारी गरेको हो ।
चौथो राष्ट्रिय कृषि जैविक विविधता दिवस–२०८२ का अवसरमा भूमि व्यवस्था, कृषि तथा सहकारी मन्त्रालय कर्णाली प्रदेश, कृषि विकास निर्देशनालय सुर्खेत, वीरेन्द्रनगर नगरपालिका र राष्ट्रिय तथा अन्तरराष्ट्रिय विकास साझेदार संस्थाहरूको समन्वयमा महोत्सव आयोजनाको तयारी गरिएको महासङ्घका अध्यक्ष लीलाराम ढकालले जानकारी दिनुभयो । उहाँका अनुसार महोत्सवमा ३० मह र २० जैविक विविधतासँग सम्बन्धित अन्नबाली, वास्तु तथा सामग्री र खाद्य परिकारका स्टल राखिनेछ ।
मुलतः जैविक विविधताको संरक्षण गर्दै कर्णालीका मौरीपालक किसानलाई प्रोत्साहित, व्यवसाय प्रवर्द्धन, मह उत्पादनमा वृद्धि, बजारीकरण र प्रचारप्रसारलाई व्यापक बनाउने उद्देश्यले दोस्रो मह महोत्सव सञ्चालन गर्न लागिएको अध्यक्ष ढकालले बताउनुभयो । उहाँले भन्नुभयो, “गत आव २०८१÷८२ मा सम्पन्न भएको तीनदिने प्रथम प्रादेशिक मह महोत्सवमा छ क्विन्टल ४८ केजी मह बिक्री भयो । यसबाट मह किसानले करिब रु १० लाख आम्दानी गरेका थिए ।”
अन्य प्रदेशभन्दा कर्णालीको महको छुट्टै पहिचान भएको बताउँदै उहाँले कर्णालीमा एक सय ७१ जना मौरीपालक किसान रहेका जनाउनुभयो । प्रदेश सरकारले कर्णालीलाई अग्र्यानिक प्रदेश निर्माण गर्ने अभियानबाट विषादी प्रयोगमा न्यूनीकरण भएको र यसबाट मौरीपालनमा सहयोग पुगेकाले पछिल्लो समयमा यो व्यवसायमा आकर्षण बढेको उहाँको भनाइ थियो ।
कृषि विकास निर्देशनालय सुर्खेतका निर्देशक चित्रबहादुर रोकायले कर्णाली मौरी र प्रजातिका हिसाबले बढी पाइने प्रदेशका साथै उत्पादित मह औषधीय गुणयुक्त छ भन्ने सन्देश महोत्सवले दिने बताउनुभयो । “यहाँ घर महमात्र होइन, भिर मह पनि पाइन्छ”, उहाँले भन्नुभयो, “यसले कृषि तथा पर्यापर्यटन प्रवर्द्धनमा सहयोग पुग्नेछ । निर्देशक रोकायका अनुसार जैविक विविधता तथा पारिस्थितिकीय प्रणाली कायम राख्न र मौरीको भूमिका रैथाने अन्नबालीको उपयोगलाई व्यापक गर्न महोत्सवले विशेष महत्व राख्नेछ ।राष्ट्रिय समाचार समिति (रासस)
