कैलाली । तराईमा अत्यधिक गर्मी बढेसंगै बर्दगोरियामा सोमबारदेखि गर्मी बिदा हुने भएको छ । बर्दगोरिया गाउँपालिकाले एक सूचना जारी गर्दै यही जेठ २९ देखि ३२ गतेसम्म चार दिन बिदा दिएको हो ।
प्रमुख प्रशासकीय अधिकृत अर्जुनसिंह कार्कीले जारी गरेको सूचनामा वर्षे वा हिउँदे बिदाबाट मिलान हुने गरी पालिका अन्तर्गतका सबै सामुदायिक तथा संस्थागत विद्यालय बन्द गर्ने निर्णय गरेको उल्लेख गरिएको छ । साथै दादुरा र रुबेला खोप लगाउन तोकिएको विद्यालयमा प्रभाव नपर्ने गरी बन्द गर्न समेत जानकारी गराइएको छ ।
गाउँपालिकाले गर्मी एवं लुबाट बच्नका लागि सावधानीका उपायहरु अवलम्बन गर्नसमेत विद्यार्थी, शिक्षक, अभिभावकमा आग्रह गरेको छ । एक साता यता तराईका जिल्लामा तातो हावासहित अत्यधिक गर्मी बढेको छ ।
कैलाली, कञ्चनपुरलगायत पश्चिम तराईका जिल्लामा ४६ डिग्री हाराहारी तापक्रम भएपछि यहाँको जनजीवन प्रभावित बनेको छ ।
बिहानैदेखि घाम चर्केर घर बाहिर निस्किन सक्ने अवस्था छैन । गर्मी बढेपछि गाउँ सहरमा मानिसको हिँडडुल ठप्पजस्तै बनेको छ । गर्मीका कारण सरकारी कार्यालयमा सेवाग्राही पातलिएका छन् । बजारमा किनमेल गर्ने कम छन् ।
