नवलपरासी । पश्चिम नवलपरासीको सुस्ता गाउँपालिकाद्वारा आगामी आर्थिक वर्षका लागि निर्माण गरिने नीति तथा कार्यक्रमका लागि स्थानीयवासीसँग सुझाव संकलन गरेको छ ।
आगामी आर्थिक वर्ष २०८० / ०८१ का लागि गाउँसभाले ल्याउने नीति, कार्यक्रम तथा बजेटबारे सरोकारवालाहरूसँग नीति कार्यक्रम तथा बजेट सम्बन्धि राय सुझाव लिएको गाउँपालिका अध्यक्ष टेक नरायण उपाध्यायले बताउनुभएको हो ।
आगामी आर्थिक वर्षका लागि निर्माण गरिने नीति तथा कार्यक्रमका लागि सुस्ता गाउँपालिका भित्र रहेका दलिय प्रतिनिधी,अगुवा किसान,बुद्धिजीवी र शिक्षक लगायतका प्रतिनिधिहरुसँग गाउँपालिकाले सुझाव लिएको हो ।
गाउँपालिकाबासीबाट प्राप्त महत्वपूर्ण राय ,सुझावहरुलाई प्राथमिकताको आधारमा समावेश गर्दै अघि बढ्ने प्रतिबद्धता व्यक्त गर्नुभयो ।
गाउँपालिकाबासीको अपेक्षा धेरै तर पालिकाको स्रोतसाधन सीमित भएकोले सोच अनुसारको काम गर्न समस्या रहेको अध्यक्ष उपाध्यायकाे भनाई थियो । आगामी वर्षको नीति, कार्यक्रम तथा बजेटमा कृषि, शिक्षा, स्वास्थ्य लगायतका क्षेत्रलाई महत्व दिदै दीर्घकालिन हितका योजना बनाउने उहाँले उल्लेख गर्नुभयो । आम नागरिकको भावनालाई समेटेर नै पालिकाले नीति तथा कार्यक्रम ल्याउने उहाँको भनाई थियो ।
त्यस्तै गाउँपालिका उपाध्यक्ष गिता चाैधरीले आगामी वर्षको नीति तथा कार्यक्रममा पालिकाबासीबाट प्राप्त सुझावलाई नै आधार मानेर नीति तथा कार्यक्रम बनाउने बताउनुभयो । उहाँले पालिकाको आवश्यकतालाई मध्यनजर गर्दै संघ र प्रदेश सरकारसँगको सहकार्यमा बजेट निर्धारण गरिने जानकारी दिनुभयो ।
राय सुझाव तथा अन्तरक्रिया कार्यक्रममा पशुपालन कृषक अगुवा नवीन डुम्रेले बिशेष गरि सुस्ता गाउँपालिकालाई पशुपालन पकेट क्षेत्र निर्धारण गरेर निति तथा कार्यक्रम ल्याउनु पर्ने राय सुझाव दिएका छन् ।
त्यस्तै गरि केरा किसान संघका अध्यक्ष लख्खु प्रसाद यादवले भारतबाट आयात हुने कृषि सामाग्रीलाई केहि हदसम्म रोक लगाउने र सुस्ता गाउँपालिका भनेको केरा पकेट क्षेत्र रहेको हुदा मल खाद्यको अभावले केरा किसानमा निराशा छाउन लागेको हुदा मलखाद व्यवस्थापन तर्फ निति तथा कार्यक्रम ल्याउनु पर्ने सुझाव व्यक्त गरेका छन् ।
त्यसैगरी नेपाली काङ्ग्रेसका सुस्ता गाउँपालिका सभापति रबिन्द्र कुमार बनियाले भुजा जस्तो बजेट बिनियोजन गर्न भएन र सुस्ता गाउँपालिकालाई समृद्व सुस्ता र सुखी सुस्ता बनाउन आम नागरिकको राय सुझाव लिएर अघि बढ्न सुझाव दिएका थिए ।
सो राय सुझाव संकलन तथा अन्तरक्रिया कार्यक्रममा जसपाका प्रतिनिधि नन्दलाल गुप्ता,राप्रपा प्रतिनिधि प्रदीप जंग राणा,दिर्घजिवी पोख्रेल,रास्वापाका प्रतिनिधि शिव गैरे र बिनोद बनिया लगायतले शिक्षा,स्वास्थ्य र कृषि क्षेत्रलाई प्राथमिकता राखेर निति तथा कार्यक्रम ल्याउनु पर्ने राय सुझाव दिएका थिए ।
प्रमुख प्रशासकीय अधिकृत बुद्ध प्रकाश पाैडेलले समुदायको अपेक्षा अनुसारका नीति तथा कार्यक्रम ल्याउनका लागि नै राय सुझाव संकलन गरिएको बताउनुभयो ।
कार्यक्रममा सहभागि सरोकारवालाहरुले कृषि, शिक्षा, स्वास्थ्य, सहकारी, खानेपानी, सडक पूर्वाधार, समावेशीकरण, भ्रष्टचार निर्मुलीकरण, सञ्चार, वन, वातावरण, पर्यटन लगायतका क्षेत्रमा दीर्घकालिन प्रभाव पर्ने खालका योजनाहरु ल्याउन सुझाव दिएका थिए ।
