कैलाली । विपन्न परिवारका महिलालाई आत्मनिर्भर बनाउन लघु उद्यमशीलताको विकासमा जोड दिइएको छ । ग्रामीण भेगका महिलालाई च्याउखेतीसम्बन्धी तालिम प्रदान गरी व्यावसायिक बनाउन थालिएको हो । । कैलालीको मोहन्याल गाउँपालिका–१ का वडाध्यक्ष प्रेमबहादुर बुढाले रु ५० हजार व्यक्तिगत लगानीमा सो तालिम दिएका हुन् । वडाध्यक्ष बुढाको आर्थिक सहयोगमा जनचेतना महिला लघुउद्यमी समूहको आयोजनामा ७ दिने तालिम सञ्चालन गरिएको हो । उद्यमशीलतातर्फ अग्रसर गराउन वडाका १९ परिवारका महिलालाई च्याउखेती तालिम प्रदान गरिएको हो । विपन्न अवस्थाका महिलाको आर्थिक अवस्था सुदृढ गर्नका लागि कार्यक्रम सञ्चालन गरिएको वडाध्यक्ष बुढाले बताए । उनले महिलालाई तालिमका क्रममा च्याउखेतीका लागि पराल तयार गर्ने, प्लाष्टिक टनेल बनाउने, प्लाष्टिकका थैलामा च्याउको बीउँ राख्ने र बीउँ राखिसकेपछि अपनाउनुपर्ने सावधानीका बारेमा जानकारी दिने कार्य गरिएको बताए । ‘गाउँठाउँको महिला दिदीबहिनी निराश नबनुुन् । यहाँहरुको सीप विकासका लागि, आयआर्जनका क्षेत्रमा मैले केकति गर्न सकिन्छ, भनेर सोचेको छु ।’ उनले भने, ‘वडाको बजेटबाट होस् या आफ्नो सेवासुविधाबाट खर्च गरेर भएपनि सहयोग गर्नेछु । तपाईंहरुको आर्थिक उन्नति र क्षमता विकासमा पहल गर्नेछु ।’ उनले वडाबाट तालिमसँगै आवश्यक अनुदान सामग्री उपलब्ध गराउन सहयोग गर्ने प्रतिबद्धता समेत जनाए । तालिमको सहजिकरण तथा प्रशिक्षण लालमति रानाले गरेकी थिइन् । गत कार्तिक ११ गतेदेखि सुरु भएको तालिमको शुक्रबार समापन गर्दै प्रशिक्षक रानाले तालिमले न्यून आयस्तर भएका महिलाको आयस्रोत वृद्धिमा महत्वपूर्ण भूमिका खेल्ने बताइन् । उनले तालिममा सहभागि महिलाहरुलाई तालिमबाट सिकेका कुराहरु आफ्नो व्यवहारिक जीवनमा लागू गर्दै व्यावसायिक बन्न प्रेरित गरिन् । कार्यक्रममा वडा सदस्य प्रेम रानामगरले सीपको कार्यान्वयन हुने अपेक्षा गरिएको बताए । त्यस्तै, कार्यपालिका सदस्य ईश्वरी विष्टले आफूले सिकेको सीपको प्रयोग गर्न आग्रह गरिन् । उनले राम्रो कामबाट सबैले प्रेरणा लिनुपर्ने बताउँदै आगामी दिनमा गाउँघर, समुदायका महिलालाई लक्षित कार्यक्रम ल्याउने बताइन् ।