नवलपरासी । नेपाल प्रहरी र सशस्त्र प्रहरीले समाजमा शान्ति सुरक्षाको साथसाथै सचेतना फैलाउने तथा स्थानीय क्षेत्रको वातावरणीय सरसफाई कार्यलाई समेत निरन्तरता दिंदै आएका छन् । यस क्रममा हिन्दुहरुको महान पर्व छठको अवसरमा पश्चिम नवलपरासीको प्रतापपुर गाउँपालिका वडा न. ६ हरपुर (झुलनिपुर ) मा रहेको छठघाट सशस्त्र प्रहरी बिओपी गुठी परसौनी र प्रहरी चौकी गुठी परसौनीको आयोजनामा हरपुर स्थित झुलनिपुर छठघाट, झुलनिपुर बजार लगायतको स्थानहरुमा सरसफाई गरिएको हो । 
उक्त सरसफाइ सशस्त्र प्रहरी बि ओ पी गुठी परसौनीका सशस्त्र प्रहरी निरीक्षक उत्तम सिलवालको नेतृत्वमा रहेको सशस्त्र प्रहरी टोली , प्रहरी चौकी गुठी परसौनी प्रमुख बिकाउ शाहको नेतृत्वमा रहेको टोली र वडा सदस्य कनहिया हरिजन लगायत स्थानियहरुको उपस्थितिमा सरसफाइ भएको हो । तराईमा धुमधामले मनाइने छठ पर्वमा सशस्त्र प्रहरी सिमा सुरक्षा संगसंगै छठघाट सरसफाइ तथा रंगरोदन गरेकोमा स्थानिय सशस्त्र प्रहरीको चौतर्फी प्रशंसा भएको छ । छठ पर्वका श्रद्धालु भक्तजनले आइतबार अस्ताउदो र सोमबार उदाउदो सुर्यलाइ अर्घ दिएर पूजापाठ गरेपछि छठ पर्व विधिवत रुपमा सम्पन्न हुन्छ । सत्य र अहिंसा प्रति मानवको रुचि बढाउने र सबै जीव प्रति सहानुभूति राख्न अभिप्रेरित गर्ने तराईवासीको महान् चाड छठ पर्व कार्तिक शुक्ल चतुदर्शी छठको पहिलो दिनदेखि छठ पर्व आरम्भ भई कार्तिक मास शुक्ल पक्षको षष्ठीको दिन यो पर्व हरेक साल मनाउने गरेको छ । 
सूर्य उपासना परम्पराको मोहक पद्धति मानिएको संसारमा यही एक यस्तो पर्व हो, जसमा अस्ताउँदो र उदाउँदो सूर्यलाई पूजा गरिन्छ । सन्तानको प्राप्ति, दीर्घायु, आरोग्य र मनोकामना पूर्ण गर्नका लागि यो पर्व मनाइने गरिएको हो । यस पर्वमा छठी माता र सूर्यको पूजा गरिन्छ । यी दुइटै देवीदेउतालाई प्रशन्न पार्नका लागि कात्तिक शुक्ल पञ्चमी उत्तम तिथि भएकाले नै यो पर्व सोही तिथिमा मनाइने गरिएको हो । त्यसैगरी मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिंगडा, सुथनी,मेवा, उखु लगायतका फुलफुल पनि सुर्य भगवान र छठी मातालाई अर्घ दिने गरिन्छ । यो अवसरमा पुजाको लागि घर-घरमा विषेश त्यारी समेत गरिएको छ । अधिकांश घाटहरु छठ बाहेकको समयमा फोहोर हुने भएकाले छठ गर्नेहरु नै अधिकांश स्थानमा घाट सरसफाईमा व्यस्त हुन्छन् ।
