कैलाली । सुदूरपश्चिम प्रदेशका मुख्यमन्त्री कमलबहादुर शाहले प्रदेश सरकारले खेलकुदको विकासमा प्राथमिकता दिएको बताएका छन् । कैलालीको बौनियामा आयोजित अन्तर पालिका स्तरीय ‘मुख्यमन्त्री कप’ फुटबल प्रतियोगिताको आज उद्घाटन गर्दै मुख्यमन्त्री शाहले यस्तो बताएका हुन् ।कार्यक्रमका प्रमुख अतिथिसमेत रहेका मुख्यमन्त्री शाहले सो अवसरमा ‘एक निर्वाचन क्षेत्र, एक खेलमैदान’ र प्रदेशका राष्ट्रिय तथा अन्तर्राष्ट्रिय खेलाडीलाई पुरस्कारद्वारा सम्मानित गर्नेजस्तो नीति सरकारले लिएको स्पष्ट पारे ।उनले भने, “हामीले खेलकुद क्षेत्रमा विषेश गरी सुदूरपश्चिम प्रदेश सरकारले खेलाडी साथीहरुको मनोबल उच्च राख्नका लागि विभिन्न कोणबाट सहयोग गर्दै आएको छ । खेलकुदका माध्यमबाट लागुऔषध दुव्र्यसनीको समस्या न्यूनीकरण कसरी गर्न सकिन्छ ? भन्नेतर्फ पनि गम्भीर रुपमा लिएको छ ।”उनले राष्ट्रिय तथा अन्तराष्ट्रिय रुपमा गाउँसमाज र प्रदेशको उचाईलाई अघि बढाउने खेलाडीहरुलाई प्रदेश सरकारले पुरस्कार प्रदान गर्ने निर्णय गर्दै आएको समेत बताए । कार्यक्रममा प्रदेश सरकारका भूमि व्यवस्था, कृषि तथा सहकारीमन्त्री रामेश्वर चौधरीले किसानमैत्री नीति बनाउन लागिएको बताए ।जिल्लाका पालिकास्तरीय १६ टिमको सहभागिता रहेको उक्त फुटबल प्रतियोगिता यही मङ्सिर २१ गतेसम्म सञ्चालन हुने आयोजकले जनाएको छ । प्रतियोगितामा विजयी हुनेलाई रु दुई लाख एक हजार र उपविजेतालाई रु एक लाख पाँच हजार पुरस्कार प्रदान गरिने जनाइएको छ ।यस्तै सर्वोत्कृष्ट खेलाडीलाई रु २० हजार र विभिन्न विधातर्फका उत्कृष्ट खेलाडीलाई जनही रु १५ हजारसमेत प्रदान गर्न लागिएको जनाइएको छ ।