कैलाली । विपन्न वर्गका उपभोक्ताको आयस्तरमा वृद्धि गर्ने उद्देश्यले कैलालीको बर्दगोरिया गाउँपालिका–३ स्थित दानुफाँटा नमुना सामुदायिक वन उपभोक्ता समूहले बाख्रा वितरण गरेको छ । सामुदायिक वन समूहमा आबद्ध निम्न आयस्तर भएका उपभोक्तालाई शनिबार उन्नत जातको बाख्रा (पाठी) वितरण गरिएको हो ।
संस्थाको ११ औं वार्षिक साधारण सभामा उनीहरुलाई बाख्रा वितरण गरिएको सामुदायिक वनका अध्यक्ष टेकराज जोशीले बताए । यसका लागि सामुदायिक वन उपभोक्ता समूहले रु ४ लाख खर्च गरेको छ ।अनुदानमा दिइएको बाख्राबाट उपभोक्ताको जीवनस्तर माथि उठाउन टेवा पुग्ने विश्वास व्यक्त गर्दै सामुदायिक वनका अध्यक्ष जोशीले बाख्रापालन सजिलो पेशा भएको र छोटो समयमा उद्देश्य र लगानी अनुसारको राम्रो आयआर्जन गर्न सकिने भएकाले पेशा व्यावसायप्रति लक्षित हुँदै मनग्य लाभ हासिल गर्न उनले उपभोक्तालाई आग्रह गरे ।
‘सामुदायिक वन उपभोक्ता समूहको लगानी र अनुदानमा वितरण गरिएको बाख्राको राम्रोसँग स्याहारसुसार तथा पालन गरी यसबाट वर्षेनी राम्रो आम्दानी गर्नु हुनेछ भन्ने विश्वास लिएको छु, जोशीले भने ।’ उनले अरुका अघि उदाहरणीय बन्नसमेत किसानलाई प्रेरित गरे ।
बाख्रा हस्तान्तरण गर्दै बाख्रापालनबाट उपभोक्ताको आयस्तरमा सुधार हुने अपेक्षा गरिएको सो वन उपभोक्ता समूहका उपाध्यक्ष उदैराम विष्टले बताए ।
उपाध्यक्ष विष्टले किसानलाई सहयोग पुगोस् भन्ने उद्धेश्यले बाख्रा वितरण गरिएको बताउँदै निर्वाहमुखी कृषि प्रणालीभन्दा माथि उठेर व्यवसायिक ढंगले लाग्न आग्रह गरे ।
बाख्रा पाएपछि खुशी व्यक्त गर्दै उपभोक्ता विनिता भुलले संस्थाको उपभोक्तालाई आत्मनिर्भर बनाउने उद्देश्यअनुसार आफूहरु बाख्रापालनबाट आर्थिक तथा व्यावसायिक लाभ लिने बताइन् ।
वडा नम्बर ३ बाख्रापालनका लागि उपयुक्त वातावरण भएको वडा रहेको बताउँदै उनले व्यावसायिक रुपमा बाख्रापालन व्यवसाय अघि बढाउन उन्नत जातको बोका पनि आवश्यक रहेको जनाए ।
२०६९ सालमा स्थापना भएको सामुदायिक वनमा २०७० जेष्ठ ५ गतेदेखि वैज्ञानिक वनको अवधारणा लागू भएको हो । ४५६. ९४ हेक्टर क्षेत्रफलमा फैलिएको उक्त वनमा कुल ६५४ घरधुरीका उपभोक्ता लाभान्वित भएका छन् । १३ हजार ५ रुखविरुवा रोपण गरिएको वन हाल हराभरा देखिएको छ ।
