कैलाली । महिलामा लगानी: सभ्य र स्मुन्नत समाज निर्माणको थालनी भन्ने मूल नाराका साथ ११४ औं अन्तरास्ट्रिय महिला दिवस मनाइएको छ ।
कैलालीको मोहन्याल गाउँपालिका १ चोसेकाँडामा शुक्रबार भएको कार्यक्रममा सहभागी महिलाले विभिन्न सन्देशमूलक प्लेकार्डसहित प्रभात र्याली समेत निकालेका थिए ।
राष्ट्रिय आधारभूत विद्यालयका विद्यालय व्यवस्थापन समितिका अध्यक्ष लक्ष्मणबहादुर बमको सभापतित्वमा सञ्चालित कार्यक्रममा प्रमुख अतिथि मोहन्याल गाउँपालिका उपाध्यक्ष कमलबहादुर साउँद रहेका थिए ।
सो अवसरमा सहभागी महिलाहरुले राज्य हरेक निकायमा महिलाको समान सहभागी र प्रतिनिधित्व सुनिश्चित गर्न सबैले सहयोग गर्नुपर्ने धारणा राखेका । महिला अधिकारका सन्दर्भमा महिलाहरु संघर्ष गर्दै आएको बताउँदै विभिन्न सामाजिक विभेद, लैङ्गिक हिंसा र उत्पीडनको अन्त्यका लागि सबै एकजुट हुनुपर्नेमा जोड दिए ।
कार्यक्रम स्थानीय तहमा समेत सभ्य, समुन्नत समाज निर्माणका लागि महिला सशक्तीकरण, दिगो विकासका क्षेत्रमा समान पहुँच तथा सहभागी सुनिश्चित हुनुपर्ने बताएका थिए ।
कार्यक्रम सुदूरपश्चिमको पहिचान झल्काउने जनचेतनामूलक देउडा गीत, विद्यार्थीको साँस्कृतिक नृत्य र प्लेकार्ड प्रस्तुत गरिएको थियो । कार्यक्रम गाउँपालिका उपाध्यक्ष कमलबहादुर साउँदले नेपाली समाज भइरहेका विभिन्न प्रकारका महिला हिंसा, विभेद, उत्पीडन र विद्यमान कुप्रथा उन्मुलनका लागि सरोकारवाला निकाय जिम्मेवार र जवाफदेही बन्नुपर्ने बताएका थिए ।
उनले माहिलामाथि हुने सामाजिक विभेदका घटना निर्मुल पार्न न्यायीक समानता र सरल र सहज पहुँच हुनुपर्ने बताए ।
यस्तै, सो अवसरमा वडा नम्बर १ का वडाध्यक्ष प्रेमबहादुर बुढाले स्थानीय सरकारले महिलाको हकअधिकार प्रत्याभूति गर्न र समान सहभागीताका लागि प्रतिबद्ध भएर काम गरिरहेको बताए ।
उनले स्थानीय सामाजिक संघसंस्था, सरकारी तथा गैरसरकारी निकाय र घरपरिवार र सरोकारवाला निकायबाट भइरहेका पहल र प्रयास मात्रै पर्याप्त नभएको बताउँदै महिलामा लगानी र विशेष अधिकारको व्यवस्था गर्नुपर्ने बताए ।
कार्यक्रममा वडास्तरमा रहेका १० वटै सामुदायिक वनका अध्यक्ष तथा प्रतिनिधि, नेपाली कांग्रेसका वडासभापति गणेश घर्तीमगर, नेकपा एमालेका वडाध्यक्ष कमल बुढामगर, नेकपा माओवादी केन्द्रका वडाध्यक्ष गणेश बुढामगर, शान्ति माविका प्रअ मिनबहादुर दर्लामीमगर, मोहन्याल माविका प्रअ मानबहादुर पुनमगर, राष्ट्रिय आधारभूत विद्यालयका प्रअ रणबहादुर सहकारी लगायतको सहभागीता रहेकोे थियो ।
कार्यक्रमको सञ्चालन सिर्जनसिल आमा समूहकी सचिव रसिला पुनमगरले गरेकी थिइन् ।
