कैलाली । सेती राजमार्ग सडकखण्ड अन्तर्गत कुहिरा खोलामा पुल निर्माणले गति लिएको छ । कैलालीको बर्दगोरिया गाउँपालिका–१ र ३ जोड्ने कुहिरा खोलामा सम्झौताको २ वर्षपछि निर्माणको काम धमाधम भइरहेको हो । सवारी साधन सञ्चालन गर्न मिल्ने ७० मिटर लामो पुलको ८० प्रतिशत निर्माण कार्य पूरा भएको निर्माण कम्पनीले जनाएको छ । निर्माणधीन पुलको तीन वटा पिल्लरसहित पुलको ढलान भइसकेको आयोजना निर्माणको जिम्मेवारी पाएको नारायणम् निर्माण सेवा प्रालिले जनाएको छ । पुलको दुईतर्फ कालोपत्रका लागि ‘बेस’ निर्माण र ३६० मिटर तटबन्धको काम भइरहेको हो । वर्षायाम सुरु हुनुअघि पुलको सबै काम सम्पन्न गर्ने लक्ष्यका साथ धमाधम काम भइरहेको आयोजनाका इन्जिनियर केशवराज मिश्रले जानकारी दिए । ‘हालसम्म पुलको भौतिकतर्फ ८० प्रतिशत निर्माण र आर्थिकतर्फ ६५ प्रतिशत निकासा भएको छ,’ उनले भने, ‘अहिले कालोपत्रेको बेस निर्माण, ढलान र नदी तटबन्धको काम धमाधम भइरहेको छ ।’
वि.सं.२०७९ असार ३० मा आयोजनाको निर्माण ठेक्का सम्झौता भएको इन्जिनियर मिश्रले जानकारी दिए । उनका अनुसार आगामी वि.सं.२०८१ फागुन २८ सम्म निर्माण सम्पन्न गर्ने गरी ठेक्का सम्झौता भएको थियो । निर्माण कम्पनीले ६ करोड ५६ लाख ८८ हजार १९० रुपैयाँ भुक्तानी लिइसकेको छ । कुहिरा खोलाको पुल निर्माणले पूर्णता पाए सेती राजमार्ग अन्तर्गत कैलालीको पहाडी भु–भाग मोहन्याल गाउँपालिकामा यातायातको सहज पहुँच पुग्नेछ ।
सुर्खेत र डोटी जिल्लासँग सीमाना जोडिएका पहाडी भु–भागबाट तराईंमा आवतजावत गर्न सकिने स्थानीयबासीले बताएका छन् । अहिलेसम्म पुल निर्माण नहुँदा निकै कष्ट खेप्नु परेको स्थानीयबासीको गुनासो छ । बर्दगोरिया गाउँपालिका अध्यक्ष कर्णबहादुर कुँवरले पुल निर्माण अवस्थाबारे अनुगमन गरी जानकारी लिएका छन् । पुल निर्माण सम्पन्न भए मोहन्याल गाउँपालिका र उत्तरी भेगका जनतालाई तराईंका बजारसम्म आऊजाऊ गर्न पैदल यात्रा गर्नुपर्ने बाध्यता हट्नेछ ।
पुल नबन्दा बर्दगोरियाका स्थानीयबासीले वर्षायाममा आवतजावतको सास्ती भोग्दै आएका छन् । स्थानीयबासीले पटक–पटक माग राखेपछि निवर्तमान संघीय सांसद झपट बहादुर रावलको पहलमा पुल निर्माणका लागि बजेट विनियोजन भएको स्थानीयबासीको भनाइ छ । यसअघि राष्ट्रिय गौरवको आयोजना अन्तर्गत सेती राजमार्गको बर्दगोरिया गाउँपालिका–३ कै काँडा खोलामा पुल निर्माण भई सञ्चालनमा आएको छ । उता, उत्तरी पहाडी क्षेत्रमा पर्ने मोहन्याल गाउँपालिका–२ को झाप्रीखोलामा समेत पुल निर्माणको काम धमाधम भइरहेको छ ।
