कैलाली । हिजो देखी युवाहरुको नेतृत्व र व्यक्तित्व विकास गर्ने उद्देश्यले कैलाली जिल्लाको बर्दगोरिया गाउँपालिका वडा नं ४ को आर्थिक सहयोग र वैज्ञानिक मिडियाको समन्वयमा नेतृत्व विकास तालिम सुरु भएको छ ।
तालिममा सहभागीहरुलाई नेपाल पत्रकार महासङ्घ कैलाली जिल्लाका अध्यक्ष श्रवण देउबाले प्रशिक्षण दिएका थिए । तालिममा नेता र नेतृत्व, नेतृत्वका शैली र शीप, नेतृत्वको प्रकार, हामीमा हुनुपर्ने गुणहरु लगायत विषयमा तालिम दिइएको थियो । 
युवा भविष्यको कर्णधार र सम्भावना भएका कारण उनीहरुलाई असल संस्कार र सोचको विकास गर्न नेतृत्व विकास तालिम जरुरी रहेको वैज्ञानिक मिडियाका अध्यक्ष तथा प्रबन्ध निर्देशक टीकाराम साउँदले बताए । असल नेतृत्वबाट मात्र सामुहिक लक्ष्य हासिल गर्न सकिन्छ भन्ने अवधारणामा आधारित भएर तालिम दिइएको उनले बताए ।
तालिमबाट सिकेका कुराहरुले आफुलाई अघि बढ्न मार्ग निर्देशन गरेको सहभागीका तर्फबाट पुस्कल प्रसाद जैशीले बताए । त्यसैगरी अर्का सहभागी पुनम सुनार ले यस्ता तालिमहरु युवाहरुको लागि मार्गनिर्देशन गर्न आवश्यक रहेको र सरोकारवाला पक्षले निरन्तरता दिनुपर्ने बताईन् ।
युवाहरुमा रहेको क्षमताको विकास र समुदायको विकासमा युवाको नेतृत्व कायम गर्नको लागि तालिमको आयोजना गरिएको वडा कार्यालयले जनाएको छ । नयाँ पुस्ताको नेतृत्वले समुदायको विकासमा टेवा पुर्याउने भएकाले नेतृत्व विकासका लागि तालिमको आयोजना गरीएको वडाध्यक्ष जगत बहादुर शाहीले बताए।वडा कार्यालयमा आयोजना गरिएको तालिममा वडाका ३४ जना युवा÷युवतीको सहभागिता रहेको थियो । तालिम पस्चात सिकेका कुरालाई व्यवहारमा उतार्न वडाध्यक्ष शाही आग्रह गरे। क्रमिक रुपमा युवाहरुको विकासका लागि थप कार्यक्रमहरु गाउँपालिकामा माग गर्दै जाने र स्वयम वडाको परिचालनमा समेत नेतृत्व विकासका कार्यक्रम सञ्चालन गरिने बताए । 
