कैलाली । कैलाली जिल्लाको बर्दगोरिया गाउँपालिका वडा नम्बर ३ रानीकुण्डा, खैरेनीमा रहेको शिवशक्ति ग्रामीण विद्युत सहकारी संस्थाको १७ औं वार्षिक चुनावी साधारणसभा शनिबार सम्पन्न भएको छ ।
संस्थाका अध्यक्ष आत्मा प्रसाद जैसीको सभापतित्वमा भएको कार्यक्रममा वडा नम्बर – ३ का वडाअध्यक्ष मनऋषि आचार्य प्रमुख अतिथि रहेका थिए । कार्यक्रममा बोल्दै प्रमुख अतिथि आचार्यले चोकचौरामा विभिन्न संघ–संस्थाबारे आलोचना हुने गरेको उल्लेख गर्दै, यस्ता कार्यक्रममा सहभागी हुँदा आय–व्यय र हिसाबकिताब नबुझी ताली बजाउने प्रवृत्ति ठीक नभएको बताए। सहकारी संस्थालाई चेतावनी दिँदै उनले सडकमा राखिएका बिजुलीका पोलहरू साना हुँदा सवारी साधन ठोक्किने जोखिम बढेको र यसले ठूलो क्षति निम्त्याउने गरेको बताए। “विद्युतमा सानालाई ऐन र ठूलालाई चेन” जस्तो अवस्था देखिएको उल्लेख गर्दै उनले सर्वसाधारण उपभोक्ताहरूले कडा परिश्रम गरेर समयमै बिल तिर्दा पनि ठूलो रकम अझै उठ्न नसकेको विषयमा प्रश्न उठाए। यस्तो कमजोरी कसको हो भन्नेबारे स्पष्ट हुनुपर्ने उनको भनाइ थियो।
यस्तै, कार्यपालिका सदस्य भीम बहादुर विश्वकर्मा विशिष्ट अतिथि रहनु भएको थियो । विशिष्ट अतिथि विश्वकर्माले अब बन्ने समितिले जिम्मेवार भएर काम गर्नुपर्नेमा जोड दिँदै, बाँकी रहेका सबै रकम अनिवार्य रूपमा उठाउनुपर्ने र जहाँ–जहाँ विद्युत पुगेको छैन त्यहाँ सेवा विस्तार गर्नुपर्ने बताए। संस्थामा कसैको पनि राजनीतिक प्रभाव नचल्ने र काम गर्ने सक्षम व्यक्तिको आवश्यकता रहेको उनको भनाइ थियो। साथै, बिजुलीका पोलहरूमा विभिन्न कम्पनीका वाइफाइका तारहरू अव्यवस्थित रूपमा झुण्ड्याउँदा आगलागीको जोखिम बढेको उल्लेख गर्दै, यस समस्याको समाधानका लागि सक्षम र सक्रिय समिति आवश्यक रहेको बताए।
कार्यक्रममा बर्दगोरिया गाउँपालिका न्यायिक पालिका सदस्य बसन्ती साउँद, वडा सदस्य राम बहादुर चौधरी, भावना विक, पूर्व वडा अध्यक्ष करर्ने सुनार, पूर्व कार्यपालिका सदस्य कोकिला खत्री, पूर्व न्यायिक पालिका सदस्य टंकराज ओली, राष्ट्रिय स्वतन्त्र पार्टीका वडा सभापति चक्र बहादुर बिष्ट, नेपाली कांग्रेसका वडा सभापति नन्दाराम बिष्ट, नेकपा एमालेका वडा कार्यसमिति अध्यक्ष वीर बहादुर राना, नेपाली कम्युनिष्ट पार्टीका वडा कार्यालय समिति संयोजक दले तिरुवा, राष्ट्रिय प्रजातन्त्र पार्टीका गाउँ कार्यसमिति अध्यक्ष नवीन साउँद, नागरिक उन्मुक्ति पार्टीका वडा कार्यसमिति अध्यक्ष नेत्रबहादुर घर्ती मगर, बसन्त मुरारी माध्यमिक विद्यालय व्यवस्थापन समितिका अध्यक्ष टंक बहादुर कुँवर, जगदम्बिके भगवती माध्यमिक विद्यालयका प्रधानाध्यापक नेत्र बहादुर खड्का, रानीजरुवा सामुदायिक वन उपभोक्ता समूहका अध्यक्ष लालसिंह विश्वकर्मा, लालीगुराँस ग्रामीण विद्युत सहकारी संस्थाका अध्यक्ष अर्जुन थापा, साइनिङ स्टार युवा क्लबका अध्यक्ष गोविन्द बुढा क्षेत्री, शिक्षक तथा समाजसेवी बुद्धिजिवी शिव राज गौतम, युवा समाजसेवी गणेश विश्वकर्मा र संस्थाका संयोजक लेखा तथा सुपरिवेक्षण समितिका जय कृष्ण देवकोटा लगायत अतिथिहरूको उपस्थिति रहेको थियो।
कार्यक्रममा आर्थिक वर्ष २०८१/०८२ को कुल ३३ लाख ५६ हजार ८ सय ९४ रुपैयाँ ९० पैसा आयव्यय संस्थाका लेखा तथा सुपरिवेक्षण समितिका संयोजक जयकृष्ण देवकोटाले प्रस्तुत गरेका थिए।
संस्थाका उपाध्यक्ष यज्ञराज बन्तोलाको स्वागत मन्तव्यसँगै सुरु भएको कार्यक्रमको सञ्चालन उपभोक्ता तथा प्राविधिक कर्मचारी भेषराज जैशीले गरेका थिए । हालसम्म संस्थामा ९ सय ७९ जना उपभोक्ता आबद्ध रहेका छन् ।
चुनावी साधारण सभाबाट उपाध्यक्षमा शिव चरण डगौरा थारु, सचिवमा गोविन्द बहादुर बुढा क्षेत्री, कोषाध्यक्षमा अमृता देवी खत्री, सदस्यहरूमा रूपा देवी बिक, राधा बिक, बिमल बहादुर कठायत, लक्ष्मण बहादुर रेग्मी मगर र कालु तिरुवा भेलाबाट सर्वसमत चयन भएका छन्।
भेलामा अध्यक्ष पदका लागि तीनजनाको नाम आएको थियो । जसमा दलबहादुर तिरुवा, यज्ञराज बन्तोला र नन्दाराम बिष्टले अध्यक्ष पदका लागि नाम दिएका थिए। सहमति जुट्न नसकेपछि निर्वाचन कमिटीले आज आइतबारका लागि सहमतिका लागि बोलाएको छ। निर्वाचन कमिटीको संयोजकमा लालसिंह विश्वकर्मा, कोकिला खत्री र अर्जुन थापा रहेका छन्।
