कैलाली । स्थानीय तहले तलबभत्ता निकासा नदिएको जनाउँदै गाउँपालिकाको ध्यानाकर्षण गराएको छ । कैलालीको मोहन्याल गाउँपालिकामा नेपाल शिक्षक महासंघको स्थानीय कार्यसमितिले बुधबार मागपत्र पेश गरेको हो ।
पालिका अन्तर्गतका सामुदायिक विद्यालयमा कार्यरत प्रारम्भिक बालविकास सहजकर्ता (ईसीडी शिक्षक) र विद्यालय कर्मचारीले तलबभत्ता नपाएको मागपत्रमा भनिएको छ ।
संघीय सरकारले उपलब्ध गराएको ८ हजार रूपैयाँमा ७ हजार थप गरी १५ हजार तलबभत्ता निकासा दिनुपर्ने चार सूत्रीय माग राखेर शिक्षक महासंघको स्थानीय कार्यसमितिले शिक्षा शाखामा मागपत्र बुझाएको हो ।
स्थानीय तहले गएको साउनदेखि असोजसम्म संघीय सरकारको बजेट वक्तव्य अनुसार निर्धारण गरिएको न्यूनतम सेवासुविधा निकासा रोकेर अटेर गरेको भन्दै शिक्षक कर्मचारी असन्तुष्ट भएका हुन् ।
चालू आर्थिक वर्ष २०७८/०७९ को बजेटमा संघीय सरकारले शिक्षक र विद्यालय कर्मचारीको न्यूनतम मासिक तलब १५ हजार पुर्याउन निर्देशन दिएको भएपनि पालिकाले तलब नबढाएको नेपाल रास्टिय शिक्षक संगठनका महासंघ मोहन्याल गाउँपालिकाका अध्यक्ष नरेन्द्र थापाले बताउनुभयो ।
पालिका अन्तर्गत ५२ वटा सामुदायिक विद्यालय छन् । जसमा ९ जना लेखापाल, ५२ जना कार्यालय सहयोगी र ४० जना बालविकास सहजकर्ता कार्यरत र अन्य बिध्यालय कर्मचारी अहित१ सय जनाले वृद्धि भएको तलब नपाएको नेपाल शिक्षक महा संघ मोहन्यालका अध्यक्ष भण्डारीले जानकारी दिनुभयो ।
शिक्षक महासंघ स्थानीय कार्यसमितिले पालिका अन्तर्गत कार्यरत शिक्षकको तलबभत्ता हरेक ३/३ महिनामा उपलब्ध गराउने व्यवस्था गर्नुपर्ने, गाउँपालिका शिक्षा समितिमा भएको निर्णय अनुसारको न्यूनतम १५ हजार निकासा हुनुपर्ने, शुन्य दरबन्दी कायम भएका विद्यालयको विषयगत नीजिस्रोत र शिक्षण सहयोग अनुदान कोटामा कार्यरत शिक्षकको तलब दिनुपर्ने, अन्त्यमा मात्रै खुल्ला विज्ञापन गरिनुपर्ने र कार्यरत शिक्षकलाई नै विज्ञापनमा पहिलो प्राथमिकता दिइनुपर्ने माग गरिएको छ । माग सम्बोधन नभए आउँदो कार्तिक ११ गतेदेखि आन्दोलनमा जाने शिक्षक महासंघको स्थानीय कार्यसमितिले चेतावनी दिएको छ ।
गाउँपालिकाले यसअघि नीजिस्रोतमा कार्यरत शिक्षकको मासिक प्रावि तहमा १३ हजार, निमावि तहमा १४ हजार र मावि तहमा १५ हजार रुपैयाँका दरले वार्षिक १३ महिना बराबरको तलब निकासा गर्दै आएको थियो । गाउँपालिकामा २२ वटा प्रावि, २१ निमावि र ९ वटा मावि रहेको नेपाल शिक्षक महासंघ मोहन्यालका अध्यक्ष वीर बहादुर भन्डारीले बताउनुभयो ।
