कैलाली । कैलालीको बर्दगोरिया गाउँपालिकाले गत आर्थिक वर्ष २०७८/०७९ मा खाना तथा विविध तर्फ दश लाख खर्च गरेको छ । पालिकाको कुल आन्तरिक आय २ करोड ५ लाख २० हजार २ सय ९२ को ४.८७ प्रतिशत रकम खाना तथा विविधमा खर्च गरेको महालेखा परीक्षकको प्रतिवेदनमा उल्लेख गरिएको छ ।
स्थानीय सरकार सञ्चालन ऐन २०७४ दफा ७१ बमोजिम व्ययको बजेट अनुमान आन्तरिक आयको परिधि भित्र रही औचित्यको आधारमा खर्च गर्नु पर्ने व्यवस्था छ । महालेखाले सोही अनुसार खर्च गर्न पनि सुझाव दिएको छ । आर्थिक वर्ष २०७७/०७८ मा खानामा ३० लाख खर्च गरेको गाउँपालिकाले गत आर्थिक वर्षमा २० लाख कम खर्च गरेको हो । यो अनुपात चालु आर्थिक वर्ष २०७९/०८० मा झनै कम हुने अपेक्षा गरिएको छ ।
“हामी जिम्मेवारीमा आइसके पछि महालेखाको सुझावलाई आत्मसाथ गर्दै अतिथि सत्कार बाहेक हामीले हामीले खाना खाने गरेका छैनौ । हाल सम्म कुनै पनि जनप्रतिनिधि वा कर्मचारीले गाउँपालिकाको रकमबाट होटेलमा खाना खाएका रेकर्ड छैन । बैठकमा पनि कालो चिया बाहेक खाँदैनौ ।” गाउँपालिकाका प्रवक्ता एवम् वडा नम्बर १ का वडा अध्यक्ष मिथुन गौतमले भने ।
