बर्दगोरियामा कालोपत्रे उप्के पछि एक्सनमा स्थानीय सरकार

वैज्ञानिक मिडिया प्रकाशित मिती : बुधबार, साउन १७, २०८०

कैलाली। कैलालीको बर्दगोरिया गाउँपालिकामा गरिएको कालोपत्रे उप्के पछि गाउँ सरकार एक्सनमा उत्रिएको छ । आफू खुसी कमसल काम गरेर गाउँ सरकारको बदनाम गराएको भन्दै गाउँपालिकाले कारबाही प्रक्रियामा जाने बताएको छ ।

पालिकाको वडा नम्बर २ मा यति बेला रिङरोड कालोपत्रे गर्ने काम भइरहेको छ । सो काम कमसल भएको भन्दै स्थानीयहरूले गाउँ सरकार र ठेकेदारको चर्को आलोचना समेत गरेका छन् । तर गाउँ पालिकाले भने कमसल काममा आफ्नो संलग्नता नभएको दाबी गरेको छ । “करिब दुई/ढाई किलोमिटर कालोपत्रे गर्न असार १५ गते सम्मको सम्झौता थियो । तर त्यो समय सम्म ७ सय ७१ मिटर मात्रै कालोपत्रे भयो । १५ गते पछि म्याद थप बेगर काम नगर्न मौखिक जानकारी दियौ । तर ठेकेदारले काम नरोके पछि २१ गते पत्राचार समेत गरेका हौ । यती गर्दा समेत ठेकेदारले आफू खुसी काम गरेको रहेछ । त्यसमा हाम्रो अनुगमन पनि थिएन । त्यही काममा अहिले फल्ट देखिएको हो ।” गाउँपालिकाका प्रमुख प्रशासकीय अधिकृत अर्जुन सिंह कार्कीले भने ।

कालोपत्रेको विषयमा आलोचना बढेपछि गाउँ सरकारले विज्ञप्ति समेत सार्वजनिक गरेको छ । सम्झौता अवधि सम्म ठेकेदारले गरेको काम ७ सय ७१ दशमलव ५ मिटर कालोपत्रेको बिल भुक्तानी भई सकेको र पछि अनुमति बेगर ठेकेदारले गरेको काम गाउँ सरकारलाई जानकारी नभएको प्रवक्ता मिथुन गौतमद्वारा हस्ताक्षरित विज्ञप्तिमा भनिएको छ । वडा नम्बर २ को रिङरोड (२ हजार ३ सय मिटर) कालोपत्रे गर्न मालिका जेबी÷जेभिले २०७९ असार १५ भित्र काम सक्ने गरी २०७८ चैत्रमा ठेक्का सम्झौता गरेको थियो । सो अवधिमा काम नसकिए पछि २०८० असार १५ भित्र सक्ने गरी २०७९ साउन ६ गते म्याद थप गरिएको थियो । सो अवधि सम्म पनि कम्पनीले करिब ८ सय मिटर मात्रै काम सकेको छ ।

यसरी बजेट अलपत्र पार्ने ठेकेदार कम्पनीलाई गाउँ सरकारले कारबाहीको दायरामा ल्याउने तयारी थालेको छ । “योजना अलपत्र पार्ने, बजेट फ्रिज गर्ने, सरकारलाई अटेरी गर्ने निर्माण कम्पनीहरूलाई अब कारबाही प्रक्रिया अघि बढ्छ । दुई नम्बरको रिङ रोडको काममा समस्या आएको छ । हुन त त्यो काम रकम भुक्तानी भएको भन्दा बाहिरको हो । ठेकेदारले आफूखुसी गरेको हो । अब रकम भुक्तानी भएको काममा समेत कडाइका साथ थप अनुगमन र निगरानी हुन्छ ।” गाउँ सरकारका प्रवक्ता गौतमले भने । यस विषयमा हामीले बुझ्न खोज्दा निर्माण कम्पनी मालिका जेबी/जेभीका प्रतिनिधि सँग फोन सम्पर्क हुन सकेन ।