कैलाली । सार्वजनिक पद र प्रतिष्ठामा रहँदा होस् चाहे नरहँदा । काम गर्ने ईच्छाशक्ति भए सामाजिक सेवामा हातेमालो गरेर पनि थुप्रै विकासका कामहरु गर्न सकिन्छ । यस्तै, प्रेरणादायी स्रोत बनेका छन्, कैलालीको मोहन्याल गाउँपालिका–१ का वडाध्यक्ष प्रेमबहादुर बुढा । पछिल्लो समय वर्षाको कारण सिचाँइ आयोजनाका पाइप टुटफुट भएर बिग्रिएका छन् । वर्षायामपछि अस्तव्यस्त उक्त कृषि सिचाँइ आयोजनाको पाइपलाइन मर्मतमा तीन दिनदेखि स्थानीयसँग श्रमदानमा जुटेको उनले सुनाए । कतिपय विकास निर्माणका कामहरु सरकारी बजेटभन्दा बाहिर जनश्रमदान गरेर पनि समस्या समाधान सकिने वडाध्यक्ष बुढाको अनुभव छ । ‘यो आयोजना २०७२/०७३ सालमा रु ३४ हजार लगानीमा बनेको हो ।
त्यसयता, कुनैपनि निकायबाट विकास र विस्तारका लागि थप बजेट परेको थिएन ।’ उनले भने, ‘वर्षाको बाढी पहिरोका कारण टुटफुट भएको थियो । यसलाई सबै मिलेर मर्मतसम्भार गरेका हौं ।’ उनले अहिले उक्त खोलामा सिचाँइ आयोजनाको मुख्य बाँध भत्किएकाले कृषि तथा खेतीपाती सिचाँइमा समस्या भएको बताए । चालू आर्थिक वर्षमा आवश्यक बजेटको व्यवस्थापन गर्ने योजना रहेको समेत उनले बताए । सामाजिक कार्यमा सक्रिय वडाध्यक्ष बुढाले निर्वाचित हुनुअघि पनि झण्डै ५ किलोमिटर ग्रामीण मोटर बाटोको ट्रयाक खोलेका थिए । जसले यहाँका स्थानीयलाई आवतजावतमा निकै सहज भएको छ । 
स्थानीयसँगको सहकार्य र दानवीर सामुदायिक वनको पहलमा त्यसबेला सो सडक निर्माण सम्पन्न भएको उनको भनाइ छ । गत साउन २० मा वडाध्यक्ष बुढाले आफ्नो एक महिनाको तलबबाट वडामा रहेको एक सामुदायिक विद्यालयलाई आर्थिक सहयोग गरेका थिए । विद्यालयको दीर्घकालीन आन्तरिक आस्रोत नभएपछि मोहन्याल मावि बडिकाथाईमा वडाध्यक्ष पिरम बुढासहित कार्यपालिका सदस्य ईश्वरी बिष्ट, वडा सदस्य प्रेम राना, हिरालाल विक र विष्णा विकले नगद हस्तान्तरण गरेका हुन् । वडाका जनप्रतिनिधिको पहलमा ५० हजार सहयोग गरेका थिए । 
यस्तै, उनले यसअघि वर्षाैंदेखि उज्यालोबिहीन भएको सो वडामा बिजुली बत्तिको सुविधा पुर्याएका थिए । वडासँग पर्याप्त बजेट नभएका कारण कतिपय विकासका कार्य स्थानीयसँगको सहकार्यमा हातेमालो गर्दै काम गरिएको उनको भनाइ छ । बुढा वडाध्यक्षमा निर्वाचित भएपछि नागरिकका स–साना काममा पनि सहयोग पुगेको स्थानीय बताउँछन् ।
