कैलाली । कैलाली जिल्लाको मोहन्याल गाउँपालिकामा गाउँमै पुगेर सामाजिक सुरक्षा भत्ता वितरण गर्न थालिएको छ । मोहन्याल गाउँपालिका वडा नम्बर ३ मा रहेको सन्राइज लक्ष्मी बैंकको साखा रहित बैन्किङ सेवाका कर्मचारी, मोहन्याल गाउँपालिकाका वडा नं ३ का वडाध्यक्ष नविन गिरी अन्य जनप्रतिनिधि कर्मचारीहरूले टोलमै पुगेर सामाजिक सुरक्षा भत्ता वितरण गरेका हुन् ।
सन्राइज लक्ष्मी बैंकको साखा रहित बैन्किङ सेवाबाट समेत टोलमै गएर भत्ता वितरण गर्ने निर्णय गरिएको र सोहीअनुरूप टोलमै पुगेर भत्ता दिएको मोहन्याल गाउँपालिकाका वडा नं ३ का वडाध्यक्ष नन्दराम गिरी (नविन)ले बताउनु भयो।
वडाको भत्कुरी, ताम्चा, सावा, राङ्गामलेखा र राजीरेक्चाका गाउँमै पुगेर सामाजिक सुरक्षा भत्ता वितरण गरिएको हो । वडाध्यक्ष गिरिले चुनावी प्रतिवद्धतामा गाउँमै पुगेर भत्ता वितरण गर्ने बुझ्ने व्यवस्था गर्ने वचन दिएका थिए ।
वृद्धवृद्धा, असक्त, अपाङ्गता, एकल र बालबालिकालाई भत्ता लिन असहज भएको थियो । त्यसैले वडा कार्यालयबाट निर्णय गरेर नागरिक सहजताका लागि गाउँमै भत्ता वितरण गरीरहेका छौ, वडाध्यक्ष गिरिले भने।
गाउँमा नै पुगेर भत्ता वितरण गर्ने कार्यक्रम कार्तिक १४ गते बाट जारी रहेको सन्राइज लक्ष्मी बैंकको साखा रहित बैन्किङ सेवाका सञ्चालक खकेन्द्र बहादुर शाही राष्कोटीले बताए । वडाका सबै टोलमा पुगेर सामाजिक सुरक्षा भत्ता वितरणमा सहज वातावरण सिर्जना गरिने उनले बताए । आज मगंलबार वडा नं ३ का विभिन्न टोलहरूमा भत्ता वितरण गरिएको थियो । गाउँमै भत्ता प्राप्त गरेपछि सेवाग्राही खुसी भएका छन् । मोहन्यालका अधिकांश ठाउँमा वृद्धवृद्धा र सामाजिक सुरक्षा भत्ता प्राप्त गर्ने लक्षित वर्गहरूका लागि बैंकिङ प्रणाली असहज भइरहेको छ ।
सामाजिक सुरक्षा भत्ता वितरण कार्यक्रममा मोहन्याल गाउँपालिकाका उपाध्यक्ष कमल बहादुर साउँद, वडा नं ६ का वडाध्यक्ष कृष्ण शाही र सोल्टा स्वास्थ्य इकाइका प्रमुख जयानन्द जोशी लगाएतकाकाे उपस्थिती रहेको थियो।
