रौतहट ।रौतहटको कटहरिया नगरपालिका ४ स्थित लालबकैया नदीको पुल छेउमा सशस्त्र प्रहरी संग मोटरसाईकल जुधेर घाईते भएका एकजना स्थानीयको उपचारको क्रममा मृत्यु भएको छ।सशस्त्र प्रहरी बल बेस क्याम्प दुधियाभारमा कार्यरत हवलदार सुवास सिंहले चलाएको बा ८४ प ७३८३ नम्बरको मोटरसाईकल र बिपरित दिशाबाट आउँदै गरेको विआर ३००-७९३६ नम्बरको मोटरसाईकल बुधवार दिउँसो पुलको दुईसय मीटर पूर्व पट्टी जुधेको थियो।
दुर्घटनामा गम्भीर घाईते भएका विआर ३००-७९३६ नम्बरको मोटरसाईकल चालक स्थानिय फतुवा विजयपुर ४ टेंग्राहाका ५० वर्षीय अनुठा राय यादवको उपचारको क्रममा गएराती गण्डक अस्पताल बिरगंजमा मृत्यु भएको जिल्ला प्रहरी प्रवक्ता डिएस्पी डिएसपी दीपक कुमार रायले बताएका छन्।
मृतकको शव पोष्टमार्टमका लागि नारायणी अस्पताल बिरगंजमा लागिएको छ। घटनाबारे अहिलेसम्म कुनै लिखित उजुरी नआएकाले जाहेरी आएपछी थप अनुसन्धान तथा कानुनी कारवाहीको प्रक्रिया अगाडी बढाईने प्रवक्ता रायले न्युज कारखाना लाई जानकारी दिएका छन्।
यसैबीच आमजनता पार्टीका अध्यक्ष तथा पूर्वमन्त्री प्रभु साहले बिहीवार घटनाबारे सदनमा सरकार लाई जानकारी गराएका थिए। उनले कमिसनको चक्करमा तस्कर पक्राउ गर्ने नाउँमा जबरदस्ती दुर्घटना गराउने सशस्त्र प्रहरी माथी कार्वाही र घटनाको छानबिन हुनुपर्ने सरकार संग माग गरेका थिए।
तराई मधेसमा सशस्त्र प्रहरीले कमिसनको चक्करमा परेर किसान, ब्यापारी देखी सर्वसाधारण लाई दुःख दिदैआएकाले त्यस्तो काम तत्काल बन्द हुनुपर्ने माग गरेका थिए।
सशस्त्र प्रहरी बल मधेश प्रदेश कार्यालय बर्दिवासका प्रवक्ता एसएसपी सुरजसेन ओलीले मोटरसाईकल दुर्घटनामा मृत्यु भएको परिवारले उचित क्षतिपुर्ति पाउने बताएका छन्। उनले रातोपाटी संग कुरा गर्दै घटनाको प्रहरी अनुसन्धानमा जे देखिन्छ त्यसै अनुसारको कारवाही हुने बिश्वास दिलाएका छन्।
के हो घटना
गत बुधवार अपरान्ह साढे तीनबजेको समय बोरामा भन्सार छलीको किराना सामान बोकेका ग ४प ४०७३ नम्बरको मोटरसाईकल गईरहेको थियो।
मोटरसाईकल हेरेर कटहरिया ४ लालबकैया पुलको पश्चिम बाँधमा बसेको सशस्त्र प्रहरी बेस क्याम्प दुधियाभारको गस्ती टोलीले रोक्न खोज्दा तस्करले तुफान कुदाएको थियो।
तुफान कुदाएर कटहरिया बजार तर्फ भाग्नलाग्दा सशस्त्र प्रहरी हवल्दार सिंहले बा ८४ प ७३८३ को मोटरसाईकलमा दुईजना चढेर तिब्रगतिमा पीछा गरेपछि कटहरिया बजारबाट किनमेल गरेर फर्किँदै गरेको भारतीय नम्बर विआर ३०० ७९३६ नम्बरको मोटरसाईकल र तस्करको ग ४प ४०७३ नम्बरको मोटरसाईकल आमुने सामुने जुधेको थियो। घटना लगत्तै तस्कर त्यहाँबाट भाग्न सफल भएको प्रत्यक्षदर्शीले बताएका छन्।
दुर्घटनामा परेर भारतीय नम्बरको मोटरसाईकल चालक फतुवा विजयपुर ४ टेंग्राहाका ५० वर्षीय अनुठा यादवको टाउको लगायतको स्थानमा गम्भीर चोट लागेको थियो भने पछाडी सवार सोही ठाउँका ४० जिनिस साह लाई सामान्य चोटपटक लागेको थियो।
दुर्घटना पछी पीडितका आफन्त तथा बजारबाट किनमेल गरी फर्किरहेका मानिसहरूले दुवैजना सशस्त्र प्रहरी लाई निर्घात कुटपिट गरेका थिए। लगतै ईलाका प्रहरी कार्यालय कटहरियाबाट गएका गस्ती टोलीमाथी हातपात भएको थियो ।
आक्रोशित स्थानीयहरूले लालबकैया नदीको पुल भएर जानेबाटो समेत अवरोध गरी दोषीमाथि कारबाहीको माग गर्दै ईलाका प्रहरी कार्यालय कटहरिया अगाडी प्रदर्शन समेत गरेका थिए।
पछी ईलाका प्रहरी कार्यालय गरुडाबाट इन्स्पेक्टर ओम प्रकाश यादवको कमाण्डमा गएको टोली र सो क्षेत्रका कैयौं सशस्त्र बेस क्याम्प बाट गएको टोलीले सम्झाई बुझाई बाटो खुलाएर दुर्घटनामा परेका तीनवटै मोटरसाईकल नियन्त्रणमा लिएको थियो।
