दमौली (तनहुँ), यहाँको आँबुखैरेनी गाउँपालिकाले तनहुँ जिल्ला स्तरीय राष्ट्रपति रनिङ शिल्ड प्रतियोगितामा पदक विजेतालाई नगदसहित सम्मान गरेको छ । गाउँपालिकाले आज एक कार्यक्रम आयोजना गरी पदक विजेता विद्यार्थीलाई नगदसहित सम्मान गरेको हो ।
जिल्ला खेलकुद विकास समितिले भिमादमा आयोजना गरेको राष्ट्रपति रनिङ शिल्ड प्रतियोगितामा आँबुखैरेनीले एक स्वर्ण, एक रजत र तीन कास्य पदक जितेको थियो । स्वर्ण पदक जित्ने एक जनालाई रु २० हजार, रजत पदक प्राप्त गर्ने एक जनालाई रु १० हजार र कास्य पदक जित्ने तीन जनालाई जनही रु पाँच हजारका दरले नगद प्रदान गरिएको गाउँपालिकाका शिक्षा शाखा प्रमुख निर्मला कुँवरले जानकारी दिनुभयो ।
तनहुँ फुटबल सङ्घद्वारा आयोजित एन्फा यु–१४ छात्र अन्तर विद्यालय फुटबल प्रतियोगितामा विजेता विद्यार्थीहरुलाई नगद रु ३० हजार प्रदान गरिएको छ ।गाउँपालिकाका अध्यक्ष शुक्र चुमानले पालिकाले खेलकुदलाई प्राथमिकता दिएको बताउँदै विद्यालयस्तरदेखि नै खेलकुद विकासका लागि सहयोग गरिने बताउनुभयो । राष्ट्रिय समाचार समिति (रासस)
