कैलाली । कैलाली जिल्लाको मोहन्याल गाउँपालिका–१ स्थित नवप्रगतिशील सामुदायिक वन क्षेत्रभित्र एक अपरिचित महिलाको शव फेला परेपछि स्थानीय क्षेत्रमा त्रास फैलिएको छ।
स्थानीय गोठालाहरूले दिउँसो जंगल क्षेत्रमा शव देखेपछि प्रहरीलाई खबर गरेका थिए। घटनास्थल सेती राजमार्ग बाट करिब दुई सय मिटर पूर्वतर्फ पर्ने बताइएको छ।
जिल्ला प्रहरी कार्यालय कैलालीका डीएसपी योगेन्द्र तिमिल्सिनाका अनुसार मृतक अन्दाजी २५ वर्षकी महिला हुन्। प्रारम्भिक विवरणअनुसार उनको मुख आगोले जलेको अवस्थामा फेला परेको छ।
उहाँका अनुसार आवश्यक कानुनी प्रक्रिया पूरा गरी शवलाई आजै पोस्टमार्टमका लागि धनगढी ल्याइने तयारी गरिएको छ।
मृतकको पहिचान खुल्न सकेको छैन। घटनाको प्रकृति र संलग्न व्यक्तिको पहिचानका लागि विस्तृत अनुसन्धान भइरहेको प्रहरीले जनाएको छ।
