कैलाली। नेकपा एमालेका उपमहासचिव लेखराज भट्टले राष्ट्र र राष्ट्रियता जोगाउन एमालेको सरकार आवश्यक रहेको बताएका छन्।
प्रेस चौतारी नेपालको २८औँ स्थापना दिवसको अवसरमा धनगढीमा आयोजित अक्षयकोष स्थापना, पुरस्कार वितरण तथा स्मारिका विमोचन कार्यक्रममा बोल्दै उपमहासचिव भट्टले यस्तो बताएका हुन् ।
आसन्न निर्वाचनमा एमालेलाई जिताउन आह्वान गर्दै उनले भने, “राष्ट्रियता जोगाउन एमालेको सरकार आवश्यक छ। आसन्न निर्वाचनमा एमालेलाई जिताऔँ।”
देशमा स्थायित्वका लागि पार्टीले नचाहँदा-नचाहँदै निर्वाचन स्वीकार गरेको स्पष्ट पार्दै उनले भने, “हामीले यो निर्वाचन चाहेका होइनौँ, तर देशको स्थायित्वका लागि निर्वाचनमा होमिएका हौँ।”
भट्टले राजनीतिक दर्शनविना संस्कृतिलाई सधैँका लागि ध्वंस गर्ने शक्तिहरू भए पनि त्यसबाट देश निर्माण सम्भव नहुने बताए।
कैलाली क्षेत्र नम्बर ४ बाट उम्मेदवारी दिएका भट्टले ‘गुगल हेरेर बोल्ने’ भन्दा भूगोल र जनताको मनोविज्ञान बुझ्ने नेता आवश्यक रहेको उल्लेख गरे। आफूले रेखाङ्कन गरेका विकास आयोजना पूरा गर्न पुनः उम्मेदवार बनेको उनले बताए।
नेकपा एमाले केन्द्रीय सदस्य तथा राष्ट्रिय सभा सदस्य लिला भण्डारीले राष्ट्रिय शक्तिलाई छिन्नभिन्न पार्न अदृश्य शक्ति सक्रिय रहेको दाबी गरे। उनले वर्तमान सरकार निर्वाचन नगर्ने मनसायमा रहेको आरोप लगाउँदै एमालेको नेतृत्वमा सरकार बनाउने वातावरण सिर्जना गर्न आह्वान गरे।
प्रेस चौतारी प्रदेश इन्चार्ज दिलबहादुर छत्यालले मुलुक विषम परिस्थितिमा रहेको भन्दै संकट समाधानमा प्रेस चौतारीले महत्वपूर्ण भूमिका खेल्नुपर्ने बताए।
नेपाल पत्रकार महासंघ सुदूरपश्चिम प्रदेश अध्यक्ष भरत शाहले राजनीतिक परिवर्तन र निर्वाचनजस्ता संवेदनशील विषयमा समाचार सम्प्रेषण गर्दा पत्रकारहरूले आचारसंहिता पूर्ण रूपमा पालना गर्दै आफ्नो सुरक्षामा पनि ध्यान दिनुपर्ने सुझाव दिए।
कार्यक्रममा नेकपा एमाले उपमहासचिव लेखराज भट्ट, प्रेस चौतारी इन्चार्ज दिलबहादुर छत्याल, एमाले केन्द्रीय सदस्यहरू लिला भण्डारी, सन्तोष शर्मा थापा, सुदूरपश्चिम प्रदेश सचिव रणबहादुर चन्द, उपसचिव भागरथी बिष्ट, एमाले कैलाली अध्यक्ष यज्ञराज ढुंगाना लगायतले मुलुकको संकट समाधान आवश्यक रहेको धारणा राखेका थिए।
पाच पत्रकार र दुई शाखालाई पुरस्कार तथा सम्मान
प्रेस चौतारी नेपालको २८औँ स्थापना दिवसको अवसरमा सुदूरपश्चिम प्रदेश कमिटी र जिल्ला कमिटीद्वारा संयुक्त रूपमा आयोजित कार्यक्रममा पाँच जना पत्रकार र दुई शाखालाई सम्मान गरिएको छ।
बिहीबार धनगढीमा आयोजित कार्यक्रममा प्रेस चौतारी सुदूरपश्चिम प्रदेश शाखाले स्थापना गरेको कर्ण बोहरा स्मृति पत्रकारिता पुरस्कार बाट एकिन्द्र तिमिल्सेना (कैलाली) र सरिता नेपाली (बाजुरा) लाई सम्मान गरिएको छ।
त्यसैगरी दीर्घ खत्री स्मृति पत्रकारिता पुरस्कार बाट रमेश विष्ट (बझाङ) पुरस्कृत भएका छन्। उत्कृष्ट शाखाका रूपमा प्रेस चौतारी नेपाल बाजुरा र कञ्चनपुर शाखालाई सम्मान गरिएको छ। प्रेस चौतारी प्रदेशले तयार गरेको स्मारिका पनि आज बिमोचन गरिएको छ ।
प्रेस चौतारी जिल्ला शाखाद्वारा स्थापना गरिएको चक्र डगौरा स्मृति पत्रकारिता पुरस्कार लिलाजंग शाहीलाई प्रदान गरिएको छ भने सृजनशील युवा पत्रकारिता पुरस्कार कमल साउदलाई प्रदान गरिएको छ।
स्थापना दिवसका अवसरमा पत्रकार अक्षयकोष स्थापना गरिएको छ। दस लाख रुपैयाँको कोष बनाउने लक्ष्यसहित सुरु गरिएको अक्षयकोषमा हालसम्म एक लाख ५८ हजार ३०० रुपैयाँ संकलन भएको प्रेस चौतारी कैलाली जिल्ला अध्यक्ष जनक विष्टले जानकारी दिए।
कोषबाट नेपाल पत्रकार महासंघका सदस्य तथा तिनका परिवारका सदस्यहरूलाई समस्या परेमा सहयोग उपलब्ध गराइने संस्थाले जनाएको छ। हेडलाइन चेन्ज गरेर बनाउनुहोस्।
