कैलाली । प्रतिनिधि सभा निर्वाचनको मिति नजिकिएसँगै मतदाता रिझाउन उम्मेदवारको दौडधुप जारी छ । निर्वाचनको सरगर्मी बढेसँगै राजनीतिक दलका उम्मेदवार मतदातासँग घरदैलो अभियानमा व्यस्त देखिन थालेका हुन् ।
मतदातालाई रिझाउन उम्मेदवार ग्रामीण बस्तीका मतदातासम्म पुग्न थालेका छन् । काँग्रेसका उम्मेदवार बिजय बहादुर स्वाँर कैलालीको मोहन्यालका कोसेकाँडा, कोल्तडी हुँदै पालिकाको केन्द्र खिमडी पुगेका हुन् ।
२६ वटा वडा रहेको निर्वाचन क्षेत्र नं.–२ मा मोहन्यालका ६ वटा पर्दछन् । यातायातको पहुँच नपुगेका वडामा पैदलयात्रा गरेर जनताको घरदैलोमा पुग्न उम्मेदवारलाई भ्याइनभ्याई छ ।
भोट माग्न पुगेका उम्मेदवारहरु प्राय:जसो ठाउँमा आफ्नै प्रचार गर्ने र अर्को उम्मेदवारभन्दा आफूलाई बलियो प्रमाणित गर्ने होड नै चलिरहेको छ ।
काँग्रेस उम्मेदवार स्वाँर पहिलोपटक प्रतिनिधि सभाको चुनावमा उम्मेदवार बनेका हुन् । उनले मतदातासँग मतदानका लागि अपिल गरे । उनले जनतामाझ नागरिकका आवश्यकता र समस्याको पहिचान गर्दै समाधानका लागि आफूले योजनाबद्ध ढङ्गले काम गर्ने बाचा गरे ।
गाउँमा पुगेका उम्मेदवार स्वाँरलाई स्थानीयले आफ्नो गाउँमा स्वागत गरेर समस्या दर्शाएका थिए । जनताका अपेक्षा सुनेपछि उम्मेदवार स्वारले आफूलाई जनताले सुम्पेको अभिभाराअनुसार समस्याको दिगो समाधान हुनेगरी काम गर्ने योजना रहेकोे बताए ।
निर्माणाधीन सेती राजमार्गले सो क्षेत्रको कृषि, पर्यटन, शिक्षा, स्वास्थ्य र यातायातको विकास र विस्तारमा कोसेढुङ्गा साबित हुने भएकाले राष्ट्रिय गौरवको आयोजनालाई केन्द्र सरकारको बहुवर्षीय आयोजना अन्तर्गत द्रुत गतिमा कार्य अघि बढाउन आवश्यक रहेकोे औंल्याउदै आफूले पहल गर्ने बताए ।
वडाध्यक्ष पिरम बुढा लगायत स्थानीयबासीले जग्गाको नाप नक्सासम्बन्धी कार्य, बिजुली, खानेपानीको समस्या, स्वास्थ्य सेवासँग जनताको पहुँच पुर्याउन आवश्यक रहेकोे बताए । आफू वडाध्यक्ष भइसकेपछि वडा नं.१ का जनताका समस्यासँग आफू नजिक रहेको बताउँदै उनले बाटोघाटो, खानेपानी र शिक्षाको विकासका लागि काम गरिरहेको बताए ।
उनले स्थानीय, प्रदेश र संघ सरकारको बजेट, नीति तथा कार्यक्रम मार्फत विकासले तीव्रता पाएको बताए ।
उमेदवार र राजनीतिक दलको सौहार्दपूर्ण व्यवहारले आम नागरिक तथा नेता कार्यकर्ताहरुमा सकारात्मक सन्देश प्रवाह गराएको छ । उमेदवारले मतदाता भेटघाट र कार्यकर्ता परिचालन गरेर चुनावी परिणाम आफ्नो पक्षमा पार्ने प्रयासमा घरदैलामा व्यस्त छन् । 
