लम्की, प्रगतिशील लोकतान्त्रिक पार्टीका प्रत्यक्ष उम्मेदवार डम्मर बहादुर रावलले आफ्नो उम्मेदवारी निष्क्रिय गर्ने घोषणा गरेका छन् । उनले नेकपा एमालेका प्रत्यक्ष उम्मेदवार सुर्य बहादुर थापालाई समर्थन गर्ने सहमति भएको जानकारी दिएका छन् ।
शनिवार लम्की स्थित सौराई होटलमा भएको सहमती पत्र घोषणा कार्यक्रममा बोल्दै उम्मेदवार रावलले भने, ‘देशको वर्तमान राजनीतिक परिस्थितिलाई मध्यनजर गर्दै र वृहत्तर लोकतान्त्रिक शक्तिहरूबीच सहकार्य आवश्यक ठानेर मैले आफ्नो उम्मेदवारी निष्क्रिय गर्ने निर्णय गरेको हुँ । अबको निर्वाचनमा नेकपा एमालेका उम्मेदवार सूर्य ब. थापालाई पूर्ण समर्थन रहनेछ ।’
प्रगतिशील लोकतान्त्रिक पार्टीकाका केन्द्रीय सदस्य तथा संविधान सभासद भगत बडुवालले क्षेत्रको विकास, स्थायित्व र मतदाताको हितलाई प्राथमिकता दिने उद्देश्य राखेको बताए ।
‘हाम्रो साझा लक्ष्य समृद्धि र सुशासन हो । त्यसका लागि समान विचारधाराका शक्तिहरू एकताबद्ध हुनु आवश्यक छ,’ बडुवालले उल्लेख गरेका छन् ।
यस्तै, नेकपा एमालेका उम्मेदवार सूर्य बहादुर थापाले रावलको निर्णयलाई स्वागत गर्दै यसले निर्वाचनमा सकारात्मक सन्देश दिने बताएका छन् । उनले भने, ‘डम्मर बहादुर रावलज्यूको समर्थनले हामीलाई थप ऊर्जा र बल मिलेको छ । क्षेत्रको समग्र विकासका लागि सबैसँग सहकार्य गर्दै अघि बढ्नेछौं ।’
दुवै पक्षबीच चुनावी सहकार्यलाई औपचारिकता दिने समझदारी भएको जनाइएको छ । यस निर्णयले सम्बन्धित निर्वाचन क्षेत्रमा चुनावी समीकरणमा नयाँ मोड ल्याउने विश्लेषण गरिएको छ ।
