कैलाली । कैलाली जिल्लाको बर्दगोरिया गाउँपालिकाको आयोजनामा सञ्चालित तीनदिने खोज पत्रकारिता तालिम सम्पन्न भएको छ। असार ११, १२ र १३ गतेसम्म सञ्चालन भएको तालिममा पत्रकारिता क्षेत्रसँग सम्बन्धित विविध विषयमा सहजीकरण गरिएको थियो।
तालिम समापन कार्यक्रम बर्दगोरिया गाउँपालिकाका सामाजिक विकास संयोजक तथा प्रवक्ता र वडा नम्बर १ का वडा अध्यक्ष मिथुन गौतमको सभापतित्वमा सुरु भएको कार्यक्रममा गाउँपालिकाका अध्यक्ष कर्णबहादुर कुँवरको प्रमुख अतिथि रहनुभएको थियो। कार्यक्रममा संञ्चारिका समूह सुदूरपश्चिम प्रदेशकी अध्यक्ष चाँदनी आचार्य र प्रशिक्षक विधा राई विशिष्ट अतिथिका रूपमा सहभागी हुनुहुन्थ्यो।
प्रमुख अतिथि कुँवरले सत्य, तथ्य र जनहितमा आधारित खोज पत्रकारिताले सुशासन, पारदर्शिता तथा उत्तरदायित्व प्रवर्द्धनमा महत्वपूर्ण भूमिका खेल्ने बताउनुभयो। स्थानीय तहका समस्या, विकास निर्माणका गतिविधि तथा जनचासोका विषयलाई तथ्यका आधारमा उजागर गर्न पत्रकारहरू जिम्मेवार, निष्पक्ष र सक्रिय हुनुपर्ने उहाँको भनाइ थियो।
सभापति मिथुन गौतमले स्थानीय पत्रकारहरूको क्षमता अभिवृद्धिका लागि यस्ता तालिम प्रभावकारी भएको उल्लेख गर्दै सिकेका ज्ञान र सीपलाई व्यवहारमा उतारेर जनपक्षीय तथा उत्तरदायी पत्रकारिता गर्न आग्रह गर्नुभयो।
विशिष्ट अतिथि चाँदनी आचार्यले खोज पत्रकारिताले समाजमा सकारात्मक परिवर्तन ल्याउन महत्वपूर्ण योगदान पुर्याउने बताउँदै स्थानीय पत्रकारहरूको क्षमता विकासका लागि यस्ता तालिमलाई निरन्तरता दिन आवश्यक रहेको धारणा व्यक्त गर्नुभयो।
विशिष्ट अतिथि तथा प्रशिक्षक विधा राईले खोज पत्रकारिताको अवधारणा, तथ्य तथा प्रमाण सङ्कलन, सूचना स्रोतको प्रभावकारी उपयोग, तथ्य परीक्षण (फ्याक्ट–चेकिङ), अनुसन्धानात्मक समाचार लेखन तथा पत्रकारिताको नैतिकतासम्बन्धी विषयमा प्रशिक्षण दिनुभएको थियो। उहाँले सत्य, प्रमाण र जनहितलाई केन्द्रमा राखेर पत्रकारिता गर्न सहभागीहरूलाई आग्रह गर्नुभयो।
तालिमका सहभागीहरूले प्राप्त ज्ञान, सीप र अनुभवलाई व्यवहारमा लागू गर्दै सत्य, निष्पक्ष र उत्तरदायी पत्रकारिताप्रति प्रतिबद्ध रहने बताएका छन्।
बर्दगोरिया गाउँपालिकाको आयोजनामा सम्पन्न उक्त तालिमले स्थानीय पत्रकारहरूको पेशागत क्षमता अभिवृद्धि गर्नुका साथै खोजमूलक पत्रकारिताको विकासमा महत्वपूर्ण योगदान पुर्याएको आयोजकले जनाएको छ।
