कैलाली। कैलालीको घोडाघोडी नगरपालिका–१ सुखडमा पर्ने सदावहार सामुदायिक वन उपभोक्ता समूहको वन क्षेत्रमा भएको अतिक्रमण प्रकरणमा सुदूरपश्चिम प्रदेश सरकारको उद्योग, पर्यटन, वन तथा वातावरण मन्त्रालयले चासो देखाएको छ।
वैज्ञानिक मिडिया र निर्भिक पोस्टमा आइतबार उक्त क्षेत्रमा अवैध रूपमा वन अतिक्रमण गरी भौतिक संरचना निर्माण भइरहेको विषयमा समाचार प्रकाशित भएपछि मन्त्रालयले डिभिजन वन कार्यालय पहलमानपुरलाई पत्राचार गर्दै आवश्यक कारबाही प्रक्रिया अघि बढाउन निर्देशन दिएको हो।
मन्त्रालयका प्रदेश सचिव दीर्घ नारायण कोइरालाले डिभिजन वन कार्यालय पहलमानपुरका प्रमुख डिभिजनल वन अधिकृत जनक पाध्यालाई लेखेको पत्रमा सदावहार सामुदायिक वनको क्षेत्रमा अवैध रूपमा वन अतिक्रमण गरी भौतिक संरचना निर्माण भइरहेको सूचना मन्त्रालयमा प्राप्त भएको उल्लेख गरिएको छ। पत्रमा वन सम्बन्धी प्रचलित कानुनबमोजिम आवश्यक कारबाही गर्न, फिल्डको वास्तविक अवस्था खुल्ने गरी फाइल खडा गर्न तथा जिल्लास्तरीय अतिक्रमण नियन्त्रण सम्बन्धी बैठकमा विषय पेश गरी बैठकको निर्णयअनुसार अतिक्रमण हटाई वन क्षेत्र कायम गर्न निर्देशन दिइएको छ। साथै, आवश्यक परे सुरक्षा निकायसँग समेत समन्वय गर्न मन्त्रालयले अनुरोध गरेको छ।
स्रोतका अनुसार डिभिजन वन कार्यालय पहलमानपुरकाका प्रमुख पाध्यालाई यस विषयमा पटक-पटक जानकारी गराउँदा समेत आवश्यक पहल नभएको भन्दै मन्त्रालयले स्पष्टीकरणसहित पत्राचार गरेको हो।
सचिव कोइरालाले अतिक्रमित क्षेत्रमा सार्वजनिक सूचना टाँस गर्नुका साथै सो क्षेत्रको अतिक्रमण हटाउन र इलाका प्रहरी कार्यालय सुखडलाई जानकारी गराउन निर्देशन समेत दिएका छन्।
मन्त्रालयले उक्त पत्रको बोधार्थ घोडाघोडी नगरपालिका र वन निर्देशनालय धनगढीलाई समेत पठाउँदै वन अतिक्रमण नियन्त्रण कार्यमा आवश्यक समन्वय र सहजीकरण गर्न अनुरोध गरेको छ।
