कैलाली । यतिबेला निर्वाचनको सरगर्मी बढेको छ । आसन्न फागुन २१ का लागि तोकिएको प्रतिनिधि सभा सदस्यको निर्वाचनको नजिकिएसँगै चुनावी चियोचर्चा चौतर्फी चुलिएको छ ।
विगतका निर्वाचनभन्दा केही फरक परिदृश्य पछिल्लो निर्वाचन देखिन थालेका छन् । चुनाव भन्न बित्तिकै नेताकार्यकर्ता, गाडी घोडा र लावालस्करको झल्को आउनु स्वभाविक हो । विगतमा तडकभडकका साथ प्रचारप्रसार हुन्थ्यो, अहिले त्यो देखिदैन । उम्मेदवारले निर्वाचन आचारसंहितामा रहेर मतदाता भेट्न थालेका छन् ।
मतदाता, उम्मेदवार, नेताकार्यकर्ता र सञ्चारमाध्यममा पनि विभिन्न चुनावी आँकलन, सर्वेक्षण र विश्लेषण हुन थालेका छन् । विगतमा राजनीतिक दलहरु चुनावी तालमेल अर्थात् गठबन्धन गरेर निर्वाचनमा होमिएका थिए तर, यसपटक त्यस्तो छैन ।
कैलाली क्षेत्र नं.-२ मा विभिन्न दल र स्वतन्त्र गरि १५ जना उम्मेदवार चुनावी प्रतिस्पर्धामा छन् । तर, नेपाली कांग्रेसबाट उम्मेदवार बनेका बिजयबहादुर स्वाँरको प्रचारशैली भने अलि फरक छ । उनले जनतालाई झुठो आश्वासन दिएर प्रचारप्रसार गर्न नहुने बताए ।
उम्मेदवारी दर्ता गराएर प्रतिस्पर्धी उम्मेदवारसँग सौहार्द र हार्दिकता साँटेर चुनावी अभियानमा जुटेका उनी, आमसभा, सम्बोधन, चुनावी भाषणभन्दा पनि भुइँमान्छेका बीचमा देखिने गरेका छन् ।
बिहीबार बौनियास्थित निर्वाचन क्षेत्रको सचिवालयमा आयोजित नेताकार्यकर्ताको छलफलमा उनले काँग्रेस नेताकार्यकर्ताले इमानदार भएर प्रचारप्रसारमा सहयोग गर्न आग्रह गरे । स्थानीय नेता, पार्टीका लगनशील कार्यकर्तालाई लिएर जनताको घरदैलो पुगिरहेका उनले भने, ‘तपाईंहरुले मलाई चुनाव जिताएर पठाउनुहोस् । म शीर निहुँरिन दिने छैन । अहिलेसम्म कुनैपनि आर्थिक अनियमितता, कुशासनमा दाग नलागेको व्यक्ति हुँ । म जनताको सेवक भइ काम गर्छु ।’
उनले परिवर्तनका कथाव्यथा सुनाएर मात्रै परिवर्तन सम्भव नहुने बताउँदै इमानदार भएर जनताका कुरा सुन्ने, पीडा सुन्ने, त्यसलाई मनन गर्ने र त्यसैमुताविक नीति निर्माण र योजना बनाउन जोड दिने उल्लेख गरे ।
सार्वभौमसत्ता सम्पन्न नेपाली जनता भएकाले संविधान, ऐनकानुनमा भएका अप्ठ्यारोलाई संशोधन गरेर जनतालाई अधिकार सम्पन्न बताउन सकिने धारणा उनले राखे ।
कैलाली क्षेत्र नम्बर २ कृषि, पर्यटन, पशुपालन, प्राकृतिक स्रोतको अथाह सम्भावनाको क्षेत्र भएर पनि धेरै कुरा सुधार्नुपर्ने अवस्था भएको उनले बताए । निर्माणाधीन अवस्थामा रहेको सेती राजमार्गको द्रुत विकासका लागि आफू काम गर्ने उनले बताए ।
‘म सबैथोक गर्छु भन्ने बाचा गर्दिन, जति गर्न सक्छु त्यति मात्रै बोल्ने हो । मेरो निर्वाचन क्षेत्रमा पहाडी पालिका मोहन्याल पनि छ’, उनले भने, ‘जुन क्षेत्र जल, जडिबुटी, पर्यटन, पशुपालन र नगदेबालीका लागि प्रख्यात छ, त्यसका लागि कृषि उत्पादन र बजारीकरणमा पनि विशेष योजना बनाउन आवश्यक छ ।’
सो अवसरमा उनले नेपाली काँग्रेसले नयाँ र युवा अनुहारलाई टिकट दिएको बताए । ‘अहिले धेरैले नयाँ भनिरहेका छन् । कस्तो नयाँ हो? उनले प्रश्न गर्दै भने, ‘विचारमा नयाँ चाहिएको हो, उम्मेदवार नयाँ हो भने म पनि यहीँ लम्कीचुहाको माटोमा हुर्केको नयाँ उम्मेदवार हुँ ।’उनले क्षेत्रमा काँग्रेस एकढिक्का भएर अघि बढेको समेत बताए ।
