काठमान्डौ/तपाईंले आफ्नो मोटरसाइकल वा गाडीको नम्बर प्लेट कसरी लेख्नु भएको छ ? सवारीको नम्बर प्लेट नियमअनुसार छ कि छैन याद गर्नुभएको छ ?
सतर्क रहनुहोस् ! यो विषयमा खेलाँची गर्दा तपाईं ट्राफिक कारबाहीमा पर्न सक्नुहुन्छ ।
महानगरीय ट्राफिक प्रहरी महाशाखाले सूचना जारी गर्दै सवारी तथा यातायात व्यवस्था ऐनले तोकेको मापदण्ड विपरीत आकारमा नम्बर लेख्ने, विभिन्न किसिमका स्टिकर टास्ने, झण्डा बनाउने, सानो अक्षरमा नम्बर लेख्ने, प्लेटको आकार सानो बनाउने जस्ता कार्य नगर्न आग्रह गरेको छ ।
नम्बर प्लेट गलत स्वरुपमा लेख्नेलाई पहिलो चरणमा सम्झाउने र पछि सवारी तथा यातायात व्यवस्था ऐन अनुसार कारबाही गर्ने महानगरीय ट्राफिक प्रहरी महाशाखाका प्रवक्ता सञ्जिव शर्मा दासले बताए ।
‘सर्वसाधरणले आफ्नो सवारी साधनको नम्बर प्लेटमा खुकुरीको स्टिकर टास्ने, झण्डा बनाउने, तोकेको साइजमा नलेख्ने लगायतका कार्य गरेको देखियो’, उनले भने ‘नम्बर प्लेटमा जथाभावी गर्न कानुनले नै बन्देज गरेको छ । पहिलो चरणमा हामी सम्झाईबुझाई गर्छौ त्यसपछि ऐन अनुसार कारबाही गर्छौैं।’
सर्वसाधारणले अन्जानमा पनि नम्बर प्लेट गलत तरिकाले लेखेको महाशाखाले जनाएको छ । कुन तरिकाले नम्बर लेख्ने ज्ञान नहुँदा यस्ता समस्या देखिएका हुन् ।
यस्तो छ नम्बर प्लेट लेख्ने सही तरिका ?
यातायात व्यवस्था विभागका अनुसार प्रदेशिक नम्बर प्लेटमा अगाडि दुई लाइनमा र पछाडि तीन लाइनमा लेख्नु पर्छ । नम्बर प्लेटमा अन्य विषय भन्दा पनि सवारीको विवरण मात्रै लेख्नुपर्छ ।
अगाडि
बागमती प्रदेश–०२
०२० प ०४३०
पछाडि
बागमती प्रदेश–०२
०२० प
०४३०
