आइतवार, बैशाख २, २०८१

लोकतान्त्रिक मान्यता, आदर्शको रक्षा र संगठन सुदृढ गर्न वडा सभापतिमा उम्मेदवारी : बिष्ट   

बौनियाँ-नेपाली काँग्रेसका नेता तथा वडासभापति नन्दाराम बिष्टले १४ औं महाधिवेशनमा पूर्ण:वडा सभापतिमा आफ्नो उम्मेदवारी रहेकोे घोषणा गर्नुभएको छ ।

कैलालीको बर्दगोरिया गाउँपालिका वडा नम्बर ३ को वडास्तरीय भेलामा वडा सभापतिमा बिष्टले आफ्नो उम्मेदवारी रहेकोे घोषणा गर्नुभएको हो । पूर्वनिर्धारित कार्यतालिकाअनुसार कांग्रेसको १४ औं महाधिवेशन भदौ १८ देखि सुरु भएपनि कैलालीको क्रियाशील सदस्यता विवादले नामावली सार्वजनिक हुन सकेको छैन । केन्द्रीय निर्वाचन समितिले दोस्रोपटक निर्वाचन कार्यतालिका संशोधित गरेको छ । कार्यतालिकाअनुसार देशभर बाँकी रहेका २० जिल्लाको वडा अधिवेशन असोज ५ गते तोकिएको छ । 

 

महाधिवेशनको उत्साहसंगै तल्लो तहका नेताकार्यकर्ता अधिवेशनको आन्तरिक तयारीमा जुटिरहेका बेला बिष्टले नेतृत्वका लागि दाबी गर्नुभएको हो । कांग्रेसको संगठन निर्माणको बलियो आधारशिला मानिने वडा तहमा नेतृत्वका लागि उम्मेदवारी दिएसंगै बिष्टले घरदैलो तथा भेटघाटलाई तीव्रता दिएको बताउनुभयो । वि.सं. २०३६ सालदेखि कांग्रेसको राजनीतिमा सक्रिय बिष्टले कांग्रेसको आन्तरिक लोकतन्त्र मजबुत बनाउन र पार्टी संगठनलाई सुदृढ गर्न वडा सभापतिमा उम्मेदवारी दिएको बताउनुभयो ।

काँग्रेसमा देखिएको आन्तरिक द्वन्द र मनमुटावलाई व्यवस्थापन गर्दै काँग्रेसलाई एकढिक्का बनाएर अगाडि लैजाने उद्देश्यले आफूले उम्मेदवारी दिएको उहाँको भनाइ छ । उहाँले भन्नुभयो, ‘वडा तहदेखि नै कमजोर संगठन र क्षेत्रमा पछिल्लो समय काँग्रेसको आन्तरिक द्वन्द व्यवस्थापन गर्न नसक्दा पार्टीको बर्चस्व र साख घट्दै गएको छ, यसलाई वडा तहबाट नै मेलमिलाप र भावनात्मक एकताको विकास गर्न जरुरी छ ।’ 

 

‘कांग्रेसले बोकेको लोकतान्त्रिक मूल्य, मान्यता र आदर्शलाई स्थापित गर्दै पार्टी संगठनलाई बलियो, मजबुत बनाउन सक्षम, असल स्वभाव र निष्ठाको राजनीति गर्ने नेतृत्वको खाँचो छ । त्यसैले, १४ औं महाधिवेशनमा मैले वडा सभापतिमा उम्मेदवारी दिने निर्णय गरेको छु ।’

 

उहाँले आफूले जीवनको उर्जाशील समय राजनीतिमा नै खर्च गरेको हुनाले सबै क्रियाशील सदस्य र नेताकार्यकर्ताले आफ्नो कामलाई मूल्यांकन गरेर सहयोग, समर्थन गरिरहेको बताउनुभयो । उहाँले भन्नुभयो, ‘जीवनको महत्वपूर्ण समय मैले राजनीतिमा खर्च गरेको छु, वडामा पार्टी संगठनलाई गतिशील तुल्याउँदै बैठक, सभा, समारोह, कार्यक्रम, आन्दोलन, संघर्ष र निर्वाचनको समयमा सबैलाई सक्रिय बनाएको छु । राजनीतिक जीवनमा मैले सामाजिक क्षेत्रमासमेत रचनात्मक सहयोग गरेकाले केही नराम्रो काम गरेजस्तो लाग्दैन, त्यसैले मलाई वडा सभापतिका लागि साथीहरूको सहयोग र समर्थन रहेको छ । सकेसम्म म सबैको सर्वसहमतिमै वडा सभापति बन्छु ।

 

उहाँले विगतमा आफू पार्टी जिम्मेवारीमा रहँदा केही कार्यक्रम तथा योजना सम्पन्न गर्न अधुरो रहेकाले आगामी कार्यकाल उक्त योजना पूरा गर्ने सोचाइ रहेको बताउनुभयो । उहाँले भन्नुभयो, ‘पद र प्रतिष्ठा भन्दा महत्त्वपूर्ण कुरा जिम्मेवारी, काम र कर्तव्य निर्वाह गर्नु हो ।’ राम्रो काम गर्नलाई पद नै चाहिन्छ भन्ने पनि होइन, त्यसैले, आफूले अहिलेसम्म गरेको काम, समय, अनुभव, क्षमता र योगदान अनुसार वडा तहमा नेतृत्वको जिम्मेवारी लिन खोजेको हो । मलाई पदको मात्रै महत्वाकांक्षा होइन ।’

 

वडा सभापति बिष्टले तत्कालिन समयमा वि.सं.२०४६ सालमा दैलेखमा रहँदा भैरेकालिकाथुम गाविस ७ बाट वडाअध्यक्ष निर्वाचित हुनुभएको थियो । कांग्रेसको सक्रिय राजनीतिमा लागेका बिष्टले वि.सं.२०६२/०६३ को जनआन्दोलनमा आफूलाई प्रहरीले हिरासतमा लिएर दु:ख र पीडा दिएको बताउनुभयो ।

यो पोस्ट हेरेर/पढेर तपाईलाई कस्तो लाग्यो ?

© २०७८/२०७९ वैज्ञानिक मिडिया सर्वाधिकार सुरक्षित. Site By : Himal Creation