बिहिबार, फाल्गुन १७, २०८०

कांग्रेस कैलालीको सचिव पदमा युवानेता सुनारको उम्मेदवारी घोषणा

कार्तिक,टीकापुर/नेपाली काँग्रेस कैलालीको सचिव पदमा युवानेता नृपबहादुर सुनारले उम्मेदवारी घोषणा गर्नुभएको छ । कांग्रेसको १४ औं महाधिवेशनका क्रममा हुने जिल्ला अधिवेशनमा आफूले सचिव पदमा उम्मेदवारी दिने उहाँले घोषणा गर्नुभएको हो ।

कांग्रेसको केन्द्रीय निर्वाचन समितिले पछिल्लोपटक कार्तिक ११ गते संशोधित नयाँ निर्वाचन कार्यतालिका सार्वजनिक गरेसंगै जिल्लामा महाधिवेशनको सरगर्मी बढ्न थालेको छ । नेताकार्यकर्ता भेटघाटलाई तीव्रता दिईरहेका युवानेता सुनारले आइतबार बौनिया पुगेर पार्टीलाई एकीकृत गर्दै जिल्लामा कांग्रेसको संगठन मजबुद तथा बलियो बनाउन आफूले पार्टी सचिवमा उम्मेदवारी दिने निर्णय गरेको बताउनुभयो ।

 

नेपाली कांग्रेस निकट भातृ संघ नेविसंघको विद्यार्थी राजनीतिबाट सक्रिय हुँदै आउनुभएका युवानेता सुनारलाई जिल्लास्तरमा बलियो युवा उम्मेदवारको रूपमा हेरिएको छ । उहाँलाई यसअघि जिल्ला सदस्य र जिल्ला कार्य सम्पादन समितिको सदस्य भएर कार्य गर्दाको अनुभव छ ।

जिल्लाभरका नेताकार्यकर्तासंगको भेटघाटका क्रममा उहाँले भन्नुभयो,‘नेपाली कांग्रेसका अग्रज नेता तथा कार्यकर्ता सबैको साथ र सहयोगका आधारमा मैले आसन्न पार्टीको १४ औं महाधिवेशनमा सचिव पदका लागि उम्मेदवारी दिने निर्णय गरेको छु ।’ ‘जिल्लाभर रहनु भएका तपाईं सबैको अमूल्य सहयोग, सद्भाव, समर्थन र शुभकामनाले म निर्वाचित हुनेमा विश्वस्त छु ।’

 

उहाँले आफू सचिवमा निर्वाचित भएमा जिल्लाका १ सय २६ वटै वडा, १३ पालिका, १० प्रदेश सभा र ५ वटा क्षेत्रीय कार्यसमिति, जिल्ला कार्यसमितिबीच समन्वय, सुमधुर सम्बन्ध र सहकार्यको भावनाको विकास गर्ने प्रतिबद्धता व्यक्त गर्नुभयो । त्यस्तै, आगामी तीनै तहको निर्वाचनमा पार्टीका सबै तहमा पार्टी पंक्तिलाई परिचालन गरि कैलाली जिल्लामा पार्टीलाई विजय गराउने, संगठनलाई चुस्तदुरुस्त राख्न नियमित बैठकको कार्यतालिका निर्माण गरि नियमितता गराउने लगायत लक्ष्य तथा योजना अघि सारेको बताउनुभयो ।

 

वि.सं.२०५३ सालमा नेविसंघको विद्यालय तहदेखि राजनीति यात्रा प्रारम्भ गर्नुभएका उहाँ विद्यालय कार्यसमितिको इकाई सभापति, वि.सं.२०५६ सालमा कैलाली बहुमुखी क्याम्पसको इकाई कार्यसमिति सदस्य 

वि.सं.२०५७ देखि २०५८ सालसम्म उपाध्यक्ष हुँदै वि.सं.२०५८ देखि २०५९ सम्म क्याम्पस इकाई सभापति बन्नुभएको थियो ।

त्यस्तै, वि.सं.२०६० सालमा एकवर्ष नेविसंघ कैलालीको सभापति, वि.सं.२०६२ देखि २०६४ सम्म नेविसंघ केन्द्रीय सदस्य, वि.सं.२०६८ देखि २०७२ सम्म नेपाल तरुण दलको केन्द्रीय सदस्य हुनुभएको थियो ।

वि.सं.२०७२ मा नेपाली कांग्रेस कैलालीको जिल्ला सदस्य र वि.सं.२०७४ मा जिल्ला कार्यक्रम तथा प्रशिक्षण शाखाको संयोजक तथा पार्टीकातर्फबाट जिल्ला प्रशासन कार्यालय कैलालीमा पार्टी प्रतिनिधि रूपमा रहेर जिम्मेवारी निर्वाह गर्दै आउनुभएको छ । 

पटकपटक प्रतिगमन विरुद्धको आन्दोलन विभिन्न समयमा गिरफतार र वि.सं.२०६२ श्रावण देखि कार्तिक सम्म ९१ दिन कैलाली जिल्ला कारगारमा राजबन्दीका रुपम जेलजीवन भोग्नुपरेको उहाँले पार्टी राजनीतिमा महत्त्वपूर्ण भूमिका र योगदान पुर्याउनु भएको थियो ।

 

कांग्रेसले यसअघि जिल्ला अधिवेशन सभ्य र भव्यरूपमा सम्पन्न गर्न उहाँलाई प्रचारप्रसार समिति संयोजकको जिम्मेवारीसमेत दिइसकेको छ । नेपाली कांग्रेसको केन्द्रीय निर्वाचन समितिले कैलालीसहित १२ जिल्लामा कार्तिक २७ देखि वडाअधिवेशन सुरु भइ जिल्ला अधिवेशन आउँदो मंसिर १० गते तोकेको छ ।

यो पोस्ट हेरेर/पढेर तपाईलाई कस्तो लाग्यो ?

© २०७८/२०७९ वैज्ञानिक मिडिया सर्वाधिकार सुरक्षित. Site By : Himal Creation