आइतवार, बैशाख २, २०८१

स्वरोजगार लघुवित्त वित्तीय संस्था लिमिटेड बौनियाँमा व्यवसायिक सीपमुलक चुरा बनाउने तालिम सम्पन्न

बौनियाँ,कैलाली/ "सुख र सम्बृद्धिको आधार ,सबैका लागि स्वरोजगार ”भने मूल नाराका साथ स्वरोजगार लघुवित्त वित्तीय संस्था लिमिटेड शाखा कार्यालय बर्दगोरीया गाउँपालिका वडा नं १ सडकपुर बौनियाँ कैलालीले बौनियामा सीपमूलक तालिम सञ्चालन हिजो बाट भएको थियो । संस्थाले दुई दिनको सीपमूलक तालिम सञ्चालन गरेको हो । शाखा कार्यालय बौनियाँमा आबद्ध सदस्यहरु मध्ये १८३ जना महिला सदस्यहरुलाई निःशुल्क रुपमा सीपमुलक चुरा बनाउने तालिम प्रदान गरेको हो । 

 

 

तालिम आज सोमवार सम्पन्न भएको छ । स्वरोजगार लघुवित्त वित्तीय संस्था लिमिटेड शाखा कार्यालय बौनियाका शाखा प्रमुख नवीन थापाको सभापतित्वमा सम्पन्न कार्यक्रममा सन नेपाल लाईफ इन्सयोरेन्स कम्पनी लिमटेड शाखा कार्यालय बौनियाका प्रमुख डम्मर बहादुर बुढाको प्रमुख आतिथ्यमा एक समारोहका बीच तालिम समापन गरिएको हो । समापन कार्यक्रममा विशिष्ट अतिथि सीपमूलक तालिम वित्तीय संस्थाका तालिम प्रशिक्षक राजु पासवान रहनु भएको थियो ।

तालिम समापन समारोहमा बोल्दै प्रमुख अतिथि बुढाले तालिमबाट सिकेका सीपलाई ब्यबहारमा लागु गर्न सहभागीहरुलाई आग्रह गरे । उनले ब्यबसाय संचालन गर्न  सिकेका सीप उपयोग गर्नुपर्नेमा जोड दिनुभयो । तालिममा लिएको ज्ञानले ब्यबसाय संचालन गरि आयआर्जन गर्न सके मात्र तालिमले सार्थकता पाउने बताउनु भयो ।

समापन समारोहमा सहभागी सरिता चौधरीले ब्यापार गर्ने सोचले चुरा बनाउने सीपमूलक तालिममा सहभागी भएको बताईन् । हामी जस्ता गरिवले ठूलो ब्यबसाय गर्न सक्दैनौं सरिताले भनिन्, थोरै लगानीमा पनि ब्यापार गरि राम्रो आम्दानी प्राप्त गर्न सकिने भएकोले चुरा बनाएर व्यापार गर्ने सोच बनाएर तालिममा सीप सिक्न आएको छु ।

तालिमका अर्का सहभागी सरस्वती वि.कले घरमै बसेर चुरा बनाएर दैनिक १ हजारसम्म कमाउन सकिने बताईन् । अर्काकोमा बनिबुतो गर्नु भन्दा घर बसेर चुरा बनाउँदा दुई दिनसम्म घामपानीमा खटेर कमाईने ज्याला भन्दा दोब्बर कमाउन सकिने उनले बताईन् ।

आफुहरुले स्थानीय स्तरमै उत्पादन गरेको चुरा गुणस्तरीय तथा आकर्षक देखिने भएकोले थोक ब्यापारीहरु घरमा आएर चुरा लाने स्थानीय मिना चौधरीले बताईन् । चुरा बनाउन अफ्ठेरो छैन, मिनाले भनिन्, थोरै लगानीले पनि ब्यापार चलाउन सकिन्छ । अर्की तालिममा सहभागी सलिना चौधरीले चुरामा लगानी भन्दा दोब्बर आम्दानी हुने भएकोले सीप सिक्ने अबसर दिएर हामी गरिवहरुको ठूलो उपकार गरेकोले संस्थालाई धन्यवाद व्यक्त गरिन् ।

सम्पन्न कार्यक्रममा बोल्दै थापाले सीप सिकाई रोजगारीको ब्यबस्था गर्ने उद्देश्यले २ दिने चुरा बनाउने तालिम संचालन गरेको उहाँको भनाई छ तालिमबाट यस क्षेत्रका महिला सदस्यहरुको आर्थिक क्रियाकलापमा वृद्धि हुनुका साथै आत्मनिर्भरतातर्फ उन्मुख हुन सहयोग पुग्ने विश्वास व्यक्त गरे । उक्त तालिमबाट सहभागीहरुले कम लागतमा चुरा बनाउने तरिका, बजारीकरणलगायतका सम्बन्धमा जानकारी हासिल गराएको थापाको भनाइ थियो।

यो भन्दा पहिले स्वरोजगार लघुवित्त वित्तीय संस्था लिमिटेड शाखा कार्यालय बौनियाँले दाल मोट भुजिया तालिम सञ्चालन गरेको थापाले बताउनु भएको थियो । थापाका अनुसार दाल मोट भुजिया तालिम सिकेर संस्थाका सदस्यहरुले विभिन्न मेला महोत्सवमा बिक्री वितरण गरी जिविको पार्जन गरेको आफनै आँखाले देख्न पाउँदा खुशी लागेको थापाले बताए । कार्यक्रमको सञ्चालन स्वरोजगार लघुवित्त वित्तीय संस्था लिमिटेड शाखा कार्यालय बौनियाँका कर्मचारी नारायण ढुङ्गानाले गर्नु भएको थियो ।

हालै संस्थाले महेन्द्रनगर जिल्लाको झलारीमा १३० जना महिला,कैलालीको गोदावरीमा ९६ जना तथा कञ्चनपुर पुनर्वासमा १२५ जना, र चौमाला १२०, सदस्यहरुलाई यस प्रकारका सीपमूलक तालिमहरु प्रदान गरिसकेको छ । वित्तीय संस्थाका प्रमूख थापाले यस्ता सीपमूलक तालिमहरु सम्पूर्ण शाखा कार्यालयहरुबाट सञ्चालन गरी सदस्यहरुको सीप अभिवृद्धिका लागि संस्था क्रियाशील रहने विचार व्यक्त गरे ।

नेपाल राष्ट्र बैंकबाट( घ) वर्गको वित्तीय संस्थाका रुपमा स्वीकृति प्राप्त स्वरोजगार लघुवित्त वित्तीय संस्था केन्द्रीय कार्यालय काठमाडौंको वनेपामा स्थापना गरी २०६६ साउन ८ गतेबाट कारोबार सुरु गरेको हो । हालसम्म संस्थाले ४५ वटा जिल्लाहरुका ९१ शाखा कार्यालयहरु मार्फत करिब १ लाख २०  हजारभन्दा बढी सदस्यहरुलाई वित्तीय सेवा उपलब्ध गराउँदै आएको छ । हालसम्म संस्थाले मिति २०७८असोज महीना सम्मको रेकर्ड अनुसार करिब ६ अर्ब ३८ करोड कर्जा लगानीमा रहेको तथा सदस्यहरुबाट २ अर्ब ७४ करोडभन्दा बढी निक्षेप सङ्कलन गरेको छ ।

यो पोस्ट हेरेर/पढेर तपाईलाई कस्तो लाग्यो ?

© २०७८/२०७९ वैज्ञानिक मिडिया सर्वाधिकार सुरक्षित. Site By : Himal Creation